Marcos 6:17-29

 Ang Santos nga Ebanghelyo sumala ni San Marcos 6:17-29 (Mon. Aug. 29, 2022)

Si Herodes mismo nagsugo sa pagpadakop kang Juan ug sa pagpagaid kaniya didto sa bilanggoan. Gihimo niya kini tungod kang Herodias nga iyang gipangasawa bisan ug si Herodias asawa ni Felipe nga iyang igsoon. Kay si Juan nagsigi man gud ug badlong kang Herodes, “Dili matarong nga makigpuyo ka sa asawa sa imong igsoon.” Tungod niini nagdumot si Herodias kang Juan ug naninguha sa pagpatay kaniya. Apan wala siya makahimo niini kay wala man siya tugoti ni Herodes. Nahadlok si Herodes kang Juan kay nasayod man siya nga si Juan maayo ug balaan nga tawo busa gipanalipdan niya si Juan. Bisan tuod masamok ang hunahuna ni Herodes inigkabati niya sa tanan nga isulti ni Juan, mamati gihapon siya kaniya. Sa kataposan nakahigayon ra gayod si Herodias. Sumad kadto sa adlaw'ng natawhan ni Herodes. Nagkombira siya alang sa tanang kadagkoan sa kagamhanan ingon man sa mga pangulo sa kasundalohan ug sa mga inilang tawo sa Galilea. Ang anak nga babaye ni Herodias misulod ug misayaw ug nahimuot si Herodes ug ang iyang mga bisita. Busa ang hari miingon sa dalagita, “Unsa may imong gusto ? Ihatag ko kanimo bisag unsay imong pangayoon." Ug nanumpa pa gayod siya, “Ihatag ko kanimo ang tanan nga imong pangayoon bisan pag ang katunga sa akong gingharian !” Busa migula ang dalagita ug nangutana sa iyang inahan, “Unsa may akong pangayoon ?” Ang ulo ni Juan,” mitubag ang inahan. Ang dalagita midali pagbalik ngadto sa hari ug miingon, “Ihatag kanako karon dayon ang ulo ni Juan diha sa bandihado.” Nakapasubo kini pag-ayo sa hari apan wala siya makabalibad tungod sa iyang gipanumpa atubangan sa tanan niyang mga bisita. Busa dihadiha nagsugo siya'g usa ka sundalo sa pagpunggot sa ulo ni Juan. Miadto ang sundalo sa bilanggoan ug gipunggotan si Juan. 

Pamalandong :

KINSA MAN ANG GAWASNON – ANG TAWONG MATARONG O ANG DAOTAN ? 

Si San Agustin nag-ingon : “He who is kind is free, though he is a slave. He who is evil is a slave, though he be a king.” Ang maong panultihon napamatud-an sa Ebanghelyo karon. Si Juan usa ka matarong nga tawo ug andam mobarog sa kamatuoran bisan kon siya pagasakiton. Tungod niini siya nagpabiling gawasnon bisan kon siya gibutang sa bilanggoan. Sa laing bahin, si Herodes usa ka tawo nga imoral ug walay baroganan. Tungod sa iyang pagkadaotan, nagpabilin siyang binilanggo bisan kon siya usa ka emperador. Ang Ebanghelyo nag-ingon, “Si Herodes nahadlok kang Juan tungod kay nasayod man siya nga si Juan maayo ug balaang tawo.” Ang tawong daotan kanunay’ng mahadlok ug dili magmalinawon. Matod pa ni Eraldo Banovac," Wealth and power aren't the most important things in life. What is truly important is to have a clear conscience."

pohsiBtebAyU