Lukas 5:1-11

 Ang Santos nga Ebanghelyo sumala ni San Lukas 5:1-11 (Thu. Sept. 1, 2022)

Usa ka adlaw niana, nagtindog si Jesus sa daplin sa Lanaw sa Genesaret samtang ang mga tawo nagpunsisok Kaniya aron pagpamati sa pulong sa Dios. Didto sa daplin sa lanaw nakita Niya ang duha ka sakayan nga gibiyaan sa mga mangingisda kay nangwaswas man sila sa ilang mga pukot. Misakay si Jesus sa usa niining sakayan nga iya ni Simon ug gihangyo Niya si Simon sa pagtulod niini ug diyutay ngadto sa tubig. Unya milingkod si Jesus sa sakayan ug gitudloan Niya ang mga tawo. Sa nakahuman na Siya sa pagpanudlo, giingnan Niya si Simon, “Palawod kamo ug itaktak ang inyong mga pukot aron makakuha kamo.” Si Simon mitubag, “Magtutudlo, tibuok gabii kaming nangisda ug wala gayod kami nakuha apan kay sugo man Nimo, akong itaktak ang mga pukot.” Ilang gitaktak ang mga pukot ug daghan gayod kaayong isda ang ilang nakuha ug tungod niini ang ilang mga pukot hapit na magisi. Busa gikamay nila ang ilang mga kauban didto sa laing sakayan aron moduol ug motabang kanila. Nanuol ang ilang mga kauban ug ilang gipuno pag-ayo sa isda ang duha ka sakayan ug tungod niini hapit na sila malunod. Sa pagkakita ni Simon Pedro sa nahitabo, miluhod siya sa atubangan ni Jesus ug miingon, “Palayo kanako, Ginoo, kay makasasala ako !” Natingala kaayo siya ug ang iyang mga kauban sa kadaghan sa isda nga ilang nakuha. Natingala usab sila si Santiago ug si Juan nga mga anak ni Sebedeo ug kauban ni Simon. Unya miingon si Jesus kang Simon, “Ayaw kahadlok ! Sukad karon managat ka na ug mga tawo.” Ug sa nadala na nila ang mga sakayan ngadto sa baybayon, gibiyaan nila ang tanan ug misunod sila kang Jesus.

Pamalandong :

ASA MAN KUTOB ANG ATONG PAGSALIG SA DIOS ? Naningkamot ka pag-ayo, gibuhat nimo ang tanan, unya napakyas lang gihapon. Kon kini ang mahitabo, daghan ang mawad-ag gana, mohunong sa pagpaningkamot, ug modawat na lang sa kapakyasan. Apan lahi ang gipakitang ehemplo ni Pedro. Wala siya'y nakuhang isda sa tibuok gabii niyang pagpangisda, apan wala siya nahutdi’g paglaum. Sa dihang gidapit siya ni Jesus sa pagtaktak og usab sa iyang pukot, nisugot siya ug tungod niini, nakuha niya ang daghan kaayong mga isda. Si Thomas Edison nag-ingon : “Many of life’s failures are men who did not realize how close they were to success when they gave up.” Dili gyod kita angay’ng mawad-ag paglaum. Sama kang Pedro, mopadayon kita sa pagpaningkamot ug mosalig sa panabang sa Ginoo.

pohsiBtebAyU