Lukas 1:39-56

 Ang Santos nga Ebanghelyo sumala ni San Lukas 1:39-56 (Mon. Aug. 15, 2022 Solemnidad sa Pagsaka sa Langit sa Mahal nga Birhen Maria)

Unya nangandam si Maria ug midali pag-adto sa usa ka lungsod sa kabukiran sa Judea. Miadto Siya sa balay ni Zacarias ug nakighimamat kang Elisabet. Sa pagkabati ni Elisabet sa pangomusta ni Maria, milihok ang bata sulod sa iyang tiyan. Unya napuno sa Espiritu Santo si Elisabet ug misulti sa kusog nga tingog, “Bulahan Ka sa tanang mga babaye ! Bulahan ang Bata nga Imong ipanganak ! Pagkadako sa akong kalipay nga ang Inahan sa akong Ginoo miduaw kanako ! Kay pagkadungog ko gayod sa Imong pangomusta, milukso sa kalipay ang bata nga akong gisabak. Bulahan Ka nga mituo nga matuman gayod ang mensahe sa Ginoo Kanimo !” Unya miingon si Maria, “Nagdayeg sa Ginoo ang Akong Kalag, ug nagmalipayon Ako diha sa Dios nga Akong Manluluwas, tungod kay nahinumdom Siya Kanako nga Iyang ubos nga Sulugoon ! Ug sukad karon ang tanang tawo motawag Kanako'g Bulahan, tungod sa mga dagkong butang nga gihimo Kanako sa Gamhanang Dios. Balaan ang Iyang Ngalan ; nagpakita Siya'g kaluoy sa tanan nga may kahadlok Kaniya gikan sa usa ka kaliwatan ngadto sa tanang kaliwatan. Gibakyaw Niya ang Iyang kamot nga gamhanan ug gipatibulaag ang mga tawo nga mapahitas-on uban sa tanan nilang laraw. Gipukan Niya ang mga hari nga gamhanan gikan sa ilang mga trono, ug gituboy ang mga timawa. Gibusog Niya sa mga maayong butang ang mga gigutom, ug Iyang gipapahawa nga walay dala ang mga dato. Gituman Niya ang Iyang saad sa atong mga katigulangan. Mitabang Siya kang Israel nga Iyang sulugoon ug nahinumdom Siya pagpakita'g kaluoy kang Abraham ug sa tanan Niyang mga kaliwat hangtod sa kahangtoran !” Mipuyo si Maria ug mga tulo ka bulan uban kang Elisabet ug unya mipauli sa ila.

Pamalandong :

NGANONG GIPAUNA MAN SA PAGPASAKA SA LANGIT ANG MAHAL NGA BIRHEN MARIA SA TANANG MGA MAGTOTOO ?

Ang nahitabong pagpasaka sa langit ni Maria wala mahisulat sa Biblia, apan kabahin kini sa Tradisyon sa Simbahan sukad pa sa iyang sinugdanan. Si Maria adunay talagsaong papel sa plano sa kaluwasan nga gilatid sa Labaw’ng Makagagahum. Ang Dios nagbuhat og mga dagkong butang para Kaniya. Nahimo Siyang “bulahan sa mga babaye nga tanan” tungod kay gipili Siya sa Dios nga mahimong inahan sa Iyang Bugtong Anak. Tungod kay si Maria inahan man sa Dios, angay lamang nga dili na Siya pahulaton sa kinabuhing dayon nga gisaad sa tanan nga mahigugma ug mosunod kang Jesus. Ug kita nagmalaumon nga sa pag-abot sa saktong panahon buhaton usab sa Dios kanato ang gibuhat na Niya kang Santa Maria. Matod pa ni Santa Teresa, “In trial or difficulty I have recourse to Mother Mary, whose glance alone is enough to dissipate every fear.”

pohsiBtebAyU