Juan 12:24-26

 Ang Santos nga Ebanghelyo sumala ni San Juan 12:24-26 (Wed. Aug. 10, 2022)

Sultihan Ko kamo : ang usa ka lugas sa trigo magpabilin nga usa ra gayod ka lugas gawas kon kini ipugas sa yuta ug mamatay. Kon kini mamatay, mamunga kinig daghan. Ang magmahal sa iyang kaugalingong kinabuhi mawad-an hinuon niini. Apan ang dili mahinugon sa iyang kinabuhi niining kalibotana, magpatunhay niini alang sa kinabuhing dayon. Ang buot mag-alagad Kanako kinahanglan mosunod Kanako aron kon hain Ako, atua usab ang Akong sulugoon. Ang Akong Amahan magpasidungog kaniya nga mag-alagad Kanako.

Pamalandong :

UNSA MAN NGA MATANG SA TAWO ANG USA KA MARTIR ? 

Angay bang isipong martir ang tawong mosugot lang nga daugdaugon sa iyang isigkaingon ? Dili. Sakto bang tawgong martir ang asawa nga mopiyong lang ang mga mata sa pagpangabit sa iyang bana ? Dili. Sa mata sa Simbahan, ang martir mao ang tawo nga matinud-anon sa pagsunod kang Kristo. Sama kang Kristo, aduna siya'y kaisog sa paglaban sa kamatuoran ug sa pagsaway sa mga buhat nga dili angayan. Wala siya mag-apas sa dungog, gahum ug bahandi. Gani, mahimo niyang kalimtan ang iyang kaugalingong panginahanglan aron lamang makahatag og kaayohan sa uban. Sa panahon sa pagpanglutos, ang martir andam mohalad sa iyang kinabuhi para kang Kristo nga iyang ginamithi. Si Tertullian nag-ingon : “The blood of martyrs is the seed of the Church.”

pohsiBtebAyU