Mateo 14:22-36

 Ang Santos nga Ebanghelyo sumala ni San Mateo 14:22-36/15:1-2,10-14 (Tue. Aug. 2, 2022)

Human niini gipasakay ni Jesus sa sakayan ang mga tinun-an ug gipauna Niya ngadto sa tabok sa lanaw samtang Iyang gipalakaw ang mga tawo. Mitungas Siya nga nag-inusara sa usa ka bungtod aron mag-ampo. Ug sa pagkagabii na, si Jesus didto pa gihapon, nag-inusara. Niadtong tungora ang sakayan didto na sa lawod, gikusokuso sa mga balod kay ang hangin sungsungon man. Nianang pagkakaadlawon, si Jesus miapas kanila nga naglakaw ibabaw sa tubig. Sa pagkakita sa mga tinun-an Kaniya nga naglakaw sa tubig, nangahadlok kaayo sila ug naninggit, “Multo !” Si Jesus miingon kanila, “Ayaw kamo kahadlok ! Ako kini !” Unya si Pedro miingon, “Ginoo, kon Ikaw kana, palakta ako sa tubig nganha Kanimo.” Dali ngari,” mitubag si Jesus. Busa mikawas si Pedro sa sakayan ug milakaw sa tubig ngadto kang Jesus. Apan sa pagkamatikod niya sa kusog nga hangin, nahadlok siya ug misugod pagkaunlod. Busa misinggit siya, “Ginoo, luwasa ako !” Dihadiha gikuptan siya ni Jesus ug gibira ug miingon si Jesus kaniya, “Pagkagamay sa imong pagtuo ! Nganong nagduhaduha ka man ?” Ug nanakay silang duha sa sakayan. Unya mihunong ang hangin. Ang mga tinun-an nga didto sa sakayan misimba kang Jesus ug miingon, “Ikaw gayod ang Anak sa Dios !” Mitabok sila sa lanaw ug midunggo sa Genesaret. Nailhan si Jesus sa mga tawo busa gipakuha nila ang mga masakiton sa kasikbit nga kayutaan ug ilang gidala ngadto kang Jesus. Mihangyo sila Kaniya nga pahikapon ang mga masakiton bisan na lang sa sidsid sa Iyang bisti. Ug ang tanan nga nakahikap niini nangaayo.

Pamalandong :

KINSA MAY MAGHATAG KANATO’G KUSOG PANAHON SA KALISOD ? 

Sa pagmando ni Jesus, si Pedro nakalakaw sa tubig taliwala sa kusog nga unos ug dagkong mga balod. Apan wala madugay, si Pedro nisugod sa pag-unlod tungod kay ang iyang panan-aw nibiya kang Jesus ug didto na napunting sa nagpungasi nga hangin. Niunlod si Pedro sa dihang siya giharian dili na sa pagsalig kondili sa kahadlok. Ingon usab niini ang mahitabo sa atong kinabuhi. Kon mawad-an kita’g pagsalig, o kon makalimot kita nga kontrolado sa Dios ang tanan, mounlod kita sa atong nahimutangan. Apan kon magpabilin kitang magmasaligon sa Dios, walay bagyo o problema nga makapaunlod kanato. Sakto ang giingon ni Haruki Murakami : “When you come out of the storm, you won’t be the same person who walked in. That’s what this storm is all about.”

pohsiBtebAyU