Mateo 12:46-50

 Ang Santos nga Ebanghelyo sumala ni San Mateo 12:46-50 (Tue. July 19, 2022)

Samtang nakigsulti pa si Jesus sa mga tawo, miabot ang Iyang inahan ug mga igsoong lalaki. Nagtindog sila didto sa gawas kay gusto makigsulti Kaniya. Unya usa sa mga tawo didto miingon Kaniya, “Ang Imong Inahan ug mga igsoon atua sa gawas ug buot sila makigsulti Kanimo.” Si Jesus mitubag, “Kinsa man ang Akong inahan ? Kinsa man ang Akong mga igsoon ?” Unya gitudlo Niya ang Iyang mga tinun-an ug miingon, “Tan-awa ! Mao kini sila ang Akong inahan ug ang Akong mga igsoon. Kay ang Akong inahan ug mga igsoon mao kadtong nagbuhat sa kabubut-on sa Akong Amahan nga atua sa langit.”

Pamalandong :

UNSA MAY MAKAPAHIMO NATONG SAKOP SA PAMILYA NI JESUS ? 

Ang Katekismo nagtudlo nga pinaagi sa bunyag naluwas kita sa sala ug nahimugso pagbalik isip mga anak sa Dios, nahimo kitang mga sakop ni Kristo ug nahiusa sa Simbahan. Ang pagka-anak sa Dios ug ang pagka-igsoon ni Kristo usa diay ka gasa nga atong nadawat diha sa sakramento. Apan, angay usab nato hatagag pagtagad ang gisulti ni Jesus diha sa Ebanghelyo : “Kinsa man ang Akong inahan ? Kinsa man ang Akong mga igsoon ? Si bisan kinsa nga magbuhat sa kabubut-on sa Akong langitnong Amahan, Akong mga igsoon ug inahan.” Nga sa ato pa, ang atong pagkasakop sa pamilya sa Dios angay gayod natong puy-an. Si Pope Francis nag-ingon, “We could also say that there is only one real kind of poverty : not living as children of God and brothers and sisters of Christ.”

pohsiBtebAyU