Mateo 12:14-21

 Ang Santos nga Ebanghelyo sumala ni San Mateo 12:14-21 (Sat. July 16, 2022)

Unya nanglakaw ang mga Pariseo ug naglaraw sa pagpatay kang Jesus. Nakamatngon si Jesus mahitungod sa laraw batok Kaniya busa mibiya Siya niadtong dapita ug mikuyog Kaniya ang daghang mga tawo. Giayo Niya ang tanang masakiton ug gidid-an Niya sila pagpanugilon mahitungod Kaniya. Nahitabo kini aron matuman ang giingon ni propeta Isaias : “Ang Dios nag-ingon, ‘Ania ang Akong gipili nga sulugoon, ang Akong gihigugma ug gikahimut-an. Kaniya pakunsaron Ko ang Akong Espiritu ug isangyaw Niya ang Akong kabubut-on ngadto sa tanang katawhan. Dili Siya makiglalis o mosinggit o mohimo'g masaba nga pakigpulong sa kadalanan. Dili Niya balion ang bawog nga bugang o palungon ang nagkaawop nga suga. Magpadayon Siya sa Iyang buhat hangtod nga mapatunhay Niya ang hustisya ug Siya'y mahimong paglaom sa tanang katawhan.’ ”

Pamalandong :

KINSA MAN ANG TINOOD NGA SULUGOON SA DIOS ?

Usa sa mga mahinungdanong kalidad sa maayo nga sulugoon sa Dios mao ang pagkawalay tinguha nga mapasidunggan. Ato kining makita diha kang Kristo. Human Niya ayoha ang daghang mga masakiton, gipahimangnoan Niya ang mga tinun-an nga dili ibandilyo sa publiko ang Iyang gihimo. Klaro kaayo nga wala Siya nangandoy nga mahimong sikat ug bantogan. Sukwahi kaayo kini sa atong kasinatian. Daghan kanato ganahan lang motrabaho ug magserbisyo kon adunay magtan-aw nga mga tawo. Gusto kita nga makit-an aron daygon sa katilingban. Hinaot unta nga ang panig-ingnan ni Kristo makapausab sa atong batasan aron maangkon nato ang pagdayeg gikan sa kahitas-an. Mag-alagad unta kita uban sa dakong gugma ug alang lamang sa kadungganan sa atong Langitnong Amahan. Matod pa sa usa ka Turkish proverb, "Good people are like candles ; they burn themselves up to give others light."

pohsiBtebAyU