Mateo 10:7-15

 Ang Santos nga Ebanghelyo sumala ni San Mateo 10:7-15 (Thu. July 7, 2022)

Lakaw kamo ug isangyaw nga nagsugod na paghari ang Dios. Ayoha ninyo ang mga masakiton, banhawa ang mga patay, hinloi ang mga sanlahon ug hinginli ang mga yawa. Nakadawat kamo nga walay bayad busa panghatag kamo sa walay pagpangayo'g bayad. Ayaw kamo pagdalag kuwarta—bulawan, plata o tumbaga ; ayaw pagdalag bag sa inyong pagpanaw o ilisan o sandalyas o sungkod. Ang mamumuo angay hatagan sa iyang kabuhian. “Inig-abot ninyo sa usa ka lungsod o balangay, pangita kamo'g tawo nga moabiabi kaninyo ug pabilin uban kaniya hangtod nga mobiya kamo niadtong dapita. Inigdayon ninyo sa usa ka balay, ingna ang tagbalay, ‘Ang kalinaw mag-uban kaninyo.’ Kon modawat kaninyo ang tagbalay, ibilin kanila ang inyong panghinaot sa kalinaw. Apan kon dili, bakwia ang inyong panghinaot. Ug kon anaay dili modawat o dili mamati kaninyo, itaktak ang abog sa inyong tiil ug biyai ang ilang balay o lungsod. Hinumdomi kini : sa Adlaw sa Paghukom mas maluoy pa ang Dios sa mga tawo sa Sodoma ug sa Gomora kay sa mga tawo nianang lungsora !

Pamalandong :

NGANONG ANGAY MAN KITANG MAGMANGGIHATAGON ? 

Si Jesus nag-ingon, “Nakadawat kamo nga walay bayad ; busa, panghatag kamo nga walay bayad.” Tinuod, ang tanan natong bahandi – kwarta, talento, abilidad, trabaho, pamilya, ug mga higala – nagagikan sa Dios ug wala pabayri tungod kay kini Iya mang gasa para kanato. Apan, atong hinumduman nga ang mga bahandi gihatag dili aron gamiton para sa  kaugalingon lamang kondili aron itabang usab sa mga nanginahanglan. Dili unta kita mahadlok sa pagtabang tungod kay wala pay tawong napobre tungod sa pagkamatinabangon. Ang tawo nga manggihatagon mosamot kabahandianon ; samtang ang tawo nga magsigi’g tigum para sa kaugalingon mag-antos hinoon sa kawad-on. Adunay caption nga nag-ingon, “When you open your heart to giving, angels fly to your door.”

pohsiBtebAyU