Mateo 10:1-12,17-20

 Ang Santos nga Ebanghelyo sumala ni San Lukas 10:1-12,17-20 (Sun. July 3, 2022)

Human niini, nagpili ang Ginoo ug laing 72 ka tawo. Gipadala Niya sila sa tinagurha aron mag-una Kaniya ngadto sa tagsatagsa ka lungsod ug dapit nga hapit na Niyang adtoan. Miingon Siya kanila, “Ang anihon daghan apan diyutay ra ang mga mangangani. Busa pag-ampo kamo sa tag-iya sa anihon aron magpadala siya'g dugang pang mamumuo nga moani niini. Lakaw kamo, Ako nagpadala kaninyo nga sama sa mga nating karnero taliwala sa mga lobo. Ayaw pagdala ug puntil o bag o sandalyas ug ayaw kamo paghunong aron paghimamat kang bisan kinsa diha sa dalan. Bisan diing balaya kamo moabot, unaha ninyo pag-ingon, ‘Ang panagdait maania niining balaya.’ Kon didto may nagpuyo nga mahigugmaon sa pakigdait, ibilin kaniya ang inyong panghinaot sa pakigdait. Kon wala, ang inyong panghinaot sa pakigdait mobalik ra kaninyo. Pabilin kamo niadtong balaya ; kaon ug inom sa ilang idalit kaninyo kay ang mamumuo angay gayod nga suholan. Ayaw pagbalhinbalhin gikan sa usa ka balay ngadto sa lain. Kon moadto kamo sa usa ka lungsod ug dawaton kamo nila, kaon sa idalit kaninyo. Ayoha ang mga masakiton niadtong lungsora ug ingna ang mga tawo didto nga hapit na moabot kanila ang paghari sa Dios. Apan sa dihang moadto kamo sa usa ka lungsod ug dili kamo nila dawaton, gula kamo ngadto sa kadalanan ug ingna ninyo ang mga tawo, ‘Bisan ang abog sa inyong lungsod nga mitapot sa among mga tiil among taktakon agi'g pasidaan batok kaninyo apan timan-i nga hapit na maghari ang Dios !’ Sultihan Ko kamo nga sa Adlaw sa Paghukom mas grabi pa ang katalagman nga mahiagoman niadtong lungsora kay sa Sodoma ! Unya mibalik ang 72 nga malipayon kaayo ug miingon, “Ginoo, bisan ang mga yawa mipatuo kanamo sa among paghingilin kanila pinaagi sa Imong Ngalan !” Si Jesus mitubag kanila, “Nakita ko si satanas nga nahulog ingon sa kilat gikan sa langit. Pamati kamo ! Gihatagan Ko kamog gahom aron makahimo kamo pagyatak sa mga bitin ug sa mga tanga ug sa tanang gahom sa yawa, ug walay makaunsa kaninyo. Apan ayaw kamog kalipay tungod kay ang mga yawa mipatuo kaninyo kondili paglipay hinuon kamo kay ang inyong mga ngalan nahisulat didto sa langit.”

Pamalandong :

UNSA MAY BILI SA MGA MAGSASANGYAW NI KRISTO ? 

Ning atong Ebanghelyo karon kita gipahinumduman sa bililhon, apan delikado nga papel sa mga magsasangyaw sa Ginoo. Bililhon kini tungod kay “daghan ang anihonon apan gamay lang ang mga mangangani.” Gikinahanglan ang dugang nga magsasangyaw tungod kay daghan ang katawhan nga nanginahanglan og Ginoo sa ilang kinabuhi. Apan, ang maong trabaho delikado tungod kay ang mga magsasangyaw “mahisama man sa mga karnero nga ipadala ngadto sa mga mabangis nga lobo.” Ang pagsangyaw kang Kristo dili sayon tungod kay ang kalibotan napuno man sa mga daotan. Apan, adunay panultihon nga nagkanayon, “A small light will do a great deal when it is in a very dark place.” Ang atong matinud-anong pagsunod kang Kristo adunay gahum sa pagbuntog sa kangitngit ning kalibotan.

pohsiBtebAyU