Lukas 11:1-13

 Ang Santos nga Ebanghelyo sumala ni San Lukas 11:1-13 (Sun. July 24, 2022 Ikanapulog-Pito Nga Domingo Sulod Sa Tuig)

Usa niana ka higayon nag-ampo si Jesus didto sa usa ka dapit. Sa pagkahuman Niya'g ampo, miingon ang usa sa Iyang mga tinun-an, “Ginoo, tudloi kami sa pag-ampo sama nga gitudloan ni Juan ang iyang mga tinun-an.” Si Jesus miingon kanila, “Kon mag-ampo kamo, ingna : Amahan, simbahon unta ang balaan Mong ngalan, maghari Ka unta kanamo. Ihatag kanamo sa matag adlaw ang pagkaon nga among gikinahanglan. Ug pasayloa kami sa among mga sala kay nagpasaylo kami sa tanan nga nakasala kanamo. Ug ayaw kami itugyan sa pagsulay.’”Ug miingon si Jesus sa Iyang mga tinun-an, “Pananglit usa kaninyo moadto sa balay sa usa ka higala sa tungang gabii ug moingon kaniya, ‘Bay, pabayloa ko'g tulo ka buok pan kay miabot sa amo ang usa ko ka higala nga nagpanaw ug wala gayod akoy ikapakaon kaniya.’ Unya tubagon ka sa imong higala didto sa sulod, ‘Ayaw na ako'g samoka ! Gitrangkahan na ang pultahan ug ako ug ang akong kabataan nanghigda na busa dili na ako makabangon sa paghatag kanimo bisag unsa.’ Sultihan Ko kamo nga bisag higala ka niya, dili siya mobangon ug mohatag kanimog pan. Apan mobangon na lang siya ug mohatag kanimo sa tanan nga imong gikinahanglan kay wala ka man maulaw sa pagsigig pangayo. Busa sultihan Ko kamo : Pangayo kamo ug kamo hatagan ; pangita kamo ug kamo makakaplag ; pagtuktok kamo ug ablihan ang pultahan alang kaninyo. Kay ang tanan nga mangayo hatagan ug siya nga mangita makakaplag ug ang pultahan ablihan alang kaniya nga magtuktok. Kamong mga amahan, kinsa man kaninyo ang mohatag sa inyong anak ug bitin kon siya mangayog isda ? O mohatag kaniyag tanga kon mangayo siyag itlog ? Bisan pa sa inyong pagkadaotan, mahibalo kamong mohatag ug maayong mga butang ngadto sa inyong mga anak. Labaw pa ang Amahan nga atua sa langit nga mohatag sa Espiritu Santo kanila nga mangayo Kaniya !”

Pamalandong :

UNSA MAY MAAYONG PAMAAGI SA PAG-AMPO ?

Ang atong mga ginikanan, o kaha mga katekista, maoy nagtudlo kanato sa mga pamaagi sa pag-ampo. Nag-una niini ang mga pag-ampo nga atong gisaulo sama sa “Amahan Namo”, “Maghimaya ka Maria”, Anghelus, Rosaryo ug mga nobenaryo. Gawas niining mga “formula prayers,” pipila kanato nakat-on sa pag-ampo diha sa kahilom aron mamalandong sa mga pulong ug lihok sa Ginoo. Sa pag-ampo, dili lang ang pamaagi maoy importante kondili ang ato usab nga pagdala sa kaugalingon ug pag-ila sa Dios. Sa Ebanghelyo karon, usa sa mga tinun-an natandog nga nagsud-ong ni Jesus nga nag-ampo. Ug miingon siya, “Lord, mahimo ba nga tudloan kami Nimo og unsaon pag-ampo ?” Unya, si Jesus miingon sa Iyang mga tinun-an, “Ingna niini pag-ampo : ‘Amahan, simbahon unta ang Imong ngalan, maghari Ka unta kanamo. . . .” Kining pag-ampo nga gitudlo ni Jesus mao ang gitawag nato karon og “Amahan Namo” o “The Lord’s Prayer”. Ang “Amahan Namo” usa ka importanteng pag-ampo tungod kay iya kini ni Jesus. Usa kini ka “distinctive Christian Prayer”. Ang maong pag-ampo nagtudlo kanato sa saktong “disposition” ug “attitude” sa usa ka Kristiyanong maampoon.  Ang “Amahan Namo” usa ka mubo nga pag-ampo. Kini magpahinumdum kanato nga kon kita mag-ampo, dili kinahanglan ang daghang mga pulong. Usahay, tungod sa kadaghan sa atong ipangyawit, malimot na hinoon kita sa pagpaminaw ug pagpamalandong sa mga Pulong sa Dios.

Ang “Amahan Namo” nagtudlo usab kanato nga kita mga anak sa Dios. Sa atong pag-ampo, isipon nato nga kita namarayeg lang sa atong Amahan nga atoa sa langit. Gigamit ni Jesus ang pulong “Abba” – usa ka pulong Aramaic nga pagagamiton sa usa ka batang Hudiyo pagsangpit sa iyang amahan (Sama nga “Tatay” ang itawag sa usa ka batang Filipino sa iyang amahan). Sa panahon ni Jesus, walay Hudiyo nga makaako sa pagtawag sa Dios og “Abba”. Giisip kini nga dakong sala ! Apan si Jesus adunay lahing pag-ila sa Dios. Ang Dios dili lang usa ka hari ug labaw’ng gamhanan ; Siya usab usa ka Mahigugmaong Amahan. Kitang tanan Iyang mga pinalanggang anak. Dugang pa niana, ang “Amahan Namo” magpahinumdum kanato dili lamang sa atong relasyon sa Dios kondili usab sa atong relasyon sa isigkatawo. Tungod kay kita mga anak man sa Dios, busa kitang tanan managsoon. Mao man gani nga diha sa atong pag-ampo, atong iapil dili lang ang atong kaugalingon panginahanglanon kondili apil usab ang sa atong isigkatawo. “Hatagi mi sa among inadlaw nga pagkaon… pasayloa kami sa among mga sala.” Ug sa katapusan, ang “Amahan Namo” magtudlo kanato sa tinuod nga mga panginahanglanon sa kinabuhi. Kasagaran sa atong pag-ampo, daghan kaayo kita’g pangayoon sa Ginoo. Ang uban niini dili na kinahanglanon aron kita mabuhi ug malipay. Gani, ang uban nga atong gipangayo makadaot pa kanato. Diha sa “Amahan Namo” nag-ampo kita alang sa paghari sa Dios, alang sa pagtuman sa iyang kabubut-on, alang sa inadlaw-adlaw nga pagkaon, alang sa paghiniuli-ay, alang sa pagpasaylo, ug alang sa pagpahilayo kanato sa sala ug kadaotan. Kini nga mga butang maoy atong gikinahanglan aron mabuhi ug malipay sa tinuoray.

pohsiBtebAyU