Lukas 10:38-42

 Ang Santos nga Ebanghelyo sumala ni San Lukas 10:38-42 (Sun. July 17, 2022)

Samtang nagpadayon pagpanaw si Jesus ug ang Iyang mga tinun-an, nahiabot sila sa usa ka balangay diin may usa ka babaye nga ginganla'g Marta nga miabiabi Kaniya didto sa iyang balay. May igsoon siyang babaye nga ginganla'g Maria nga milingkod sa tiilan sa Ginoo ug namati sa Iyang gitudlo. Si Marta nagkapuliki sa pagsilbi kanila busa miduol siya ug miingon, “Ginoo, dili Ka ba manumbaling nga gipasagdan man lamang ako sa akong igsoon sa tanang buluhaton sa balay ? Sultihi siya nga motabang kanako.”Apan ang Ginoo mitubag kaniya, “Marta, Marta, naguol ug nahingawa ka sa daghang mga butang nga usa ra man unta ang gikinahanglan. Gipili ni Maria ang labing maayo ug walay makakuha niini gikan kaniya.”

Pamalandong :

Kadaghanan sa mga pari, malipayon nga magsaulog sa Santos nga Misa sa mga kabaryohan. Dili nato ikalimod nga ang mga tawong namuyo sa maong dapit maabi-abihon kaayo. Ordinaryo lamang ang ilang pamuyo apan dato sila’g kasingkasing. Sa kanunay, mag-andam gayod sila'g lami-ang pagkaon para sa pari ug sa iyang mga kauban. Apan, adunay namatikdang problema ang mga pari bahin niini kay sa tantong  pagbalikbalik nila sa kabaryohan, ilang nabantayan nga sagad sa mga mag-andam ug pagkaon para kanila dili na makasimba. Ug kini tungod kay okupado man sila sa pagpahiluna  sa pagkaon sa pari. Tungod niining maong paagiha, Nagahangyo ang mga kaparian nga usbon kining maong batasana kay para kanila dili maayo nga ang pag-andam sa pagkaon sa pari maoy makapababag sa pagsimba sa pipila ka maalagarong mga tawo. Wala may problema kon ordinaryo lang ang pagkaon sa pari o bugnaw. Ang mas  mahinungdanon mao nga ang tanan makapaminaw sa pulong sa Diyos ug makadawat kang Kristo diha sa Santos nga Misa. 

Diha sa Ebanghelyo karong Domingoha, atong nadungog ang estorya mahitungod sa duha ka igsoong babaye nga ginganla’g Marta ug Maria, nga miabi-abi kang Jesus diha sa ilang panimalay. Si Marta nagkapuliki'g andam para kang Jesus ug sa Iyang mga kauban, apan si Maria naglingkod lamang sa tiilan sa Ginoo ug namati sa Iyang mensahe. Mireklamo si Marta mahitungod sa iyang igsoon ngadto kang Jesus, apan siya ang gipahimangnoan sa Ginoo, “Ay, kanimo, Marta ! Naguol ug nahingawa ka sa daghang mga butang, nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya.”

Ang pag-asikaso ni Marta para kang Jesus dili daotan, sama nga ang pag-andam og pagkaon alang sa pari dili usab daotan. Ang pagkamatinagdanon sa bisita usa ka hiyas nga dalaygon ug angay natong buhaton. Apan sa pagbuhat niini, dili nato kalimtan ang pagpaminaw sa pagtulon-an sa Ginoo. Ang gisulti ni Jesus kang Marta dili nato angay’ng sabton nga pagsaway sa usa ka mangil-ad nga lihok, kondili pagpahiluna sa usa ka maayong buhat. Ang Ginoo nagpasabot kang Marta nga bisan tuod ikalipay Niya ang iyang giandam sa kusina, mas malipay Siya kon kini maghatag og panahon sa pagpakighinabi Kaniya ug pagpaminaw sa Iyang mensahe.

Dili nato ikalilong nga sa inadlaw-adlaw natong pagtrabaho ug pagpangita'g panginabuhi-an, usahay malimtan nato ang Ginoo. Sa kadaghan sa atong giatiman nga trabaho, usahay wala na tay panahon sa pag-ampo. Kon mag-ampo man gani, dinalian ug kadiyot ra pud. Wala na tay panahon sa pagpamalandong ug pagpaminaw sa Ginoo. Kini ang nahitabo kang Marta ug kini ang kahimtang sa atong kinabuhi nga buot ipausab sa Ebanghelyo. Ang Ebanghelyo magdasig kanato sa paghatag og unang pagtagad sa pag-ampo ug pagpaminaw sa mensahe sa Dios. Unahon ang pagpaminaw sa mga Pulong sa Dios tungod kay kini maoy maghatag sa tawo og lamdag sa iyang kinabuhi ug giya sa iyang mga buhaton. Ang tawo nga malamdagan sa Pulong sa Dios dili mahisalaag ug dili gayod makabuhat og daotan. Sakto ang gina-ingon, " The Way to heaven is not in the sky ; the Way is in the heart."

pohsiBtebAyU