Lukas 10:25-37

 Ang Santos nga Ebanghelyo sumala ni San Lukas 10:25-37 (Sun. July 10, 2022 Ikanapulog- Lima Nga Domingo Sulod Sa Tuig)

Unya miduol ang usa ka magtutudlo sa Balaod aron pagsulay kang Jesus. Nangutana siya, “Magtutudlo, unsay kinahanglan kong buhaton aron ako makadawat sa kinabuhing dayon ?”Si Jesus mitubag kaniya, “Unsa may giingon sa Kasulatan ? Ug giunsa man nimo kini pagsabot ?” Ang magtutudlo sa Balaod mitubag, “ ‘Higugmaa ang Ginoo nga imong Dios sa tibuok mong kasingkasing ug sa tibuok mong kalag ug sa tibuok mong kusog ug sa tibuok mong hunahuna’ ug ‘Higugmaa ang imong isigkatawo ingon sa paghigugma mo sa imong kaugalingon.’” Mitubag si Jesus, “Husto ang imong tubag ! Buhata kana ug makadawat ka sa kinabuhi.” Apan gusto sa magtutudlo sa Balaod nga ilhon siyang matarong busa nangutana pa gayod siya kang Jesus, “Kinsa ba diay ang akong isigkatawo ?” Si Jesus mitubag, “May usa ka tawo nga milugsong gikan sa Jerusalem ngadto sa Jerico ug gibanhigan siya sa mga tulisan. Gihuboan nila siya, gibun-og ug gibiyaan nga himalatyon. Ug nahitabo nga may usa ka pari nga miagi niadtong dalana. Sa pagkakita niya sa tawo nga gitulisan, milabay lamang siya agi sa pikas daplin. Unya nahiagi usab ang usa ka Levita. Sa pagkaduol niya, mitan-aw siya sa tawo ug unya misaylo lamang agi sa pikas daplin. Apan may usa ka Samaryanhon nga nagpanaw niadtong dalana ug nahiagi sa tawo nga gitulisan. Sa pagkakita niya sa tawo, naluoy siya. Miduol siya kaniya ug gibuboan niya'g lana ug bino ang iyang mga samad ug gibugkosan. Unya gipasakay niya ang tawo sa iyang hayop ug gihatod ngadto sa usa ka balay abotanan ug didto iyang gialimahan siya. Sa pagkaugma mihatag siya'g duha ka denario ngadto sa tig-atiman sa abotanan ug mitugon, ‘Atimana siya ug inigbalik nako dinhi bayran ko ikaw sa imong magasto.’” Ug si Jesus mitapos pag-ingon, “Karon, sa imong hunahuna kinsa man niining tulo ang nagpamatuod nga isigkatawo sa gitulisan ?” Ang magtutudlo sa Balaod mitubag, “Kadtong naluoy kaniya.” Si Jesus miingon, “Busa lakaw ug buhata ang sama sa iyang gibuhat.”

Pamalandong :

KINSA MAN ANG ATONG MATAWAG NGA SILINGAN ?

Para sa kadaghanan, ang silingan mao kadtong nagpuyo duol sa atong balay. Apan, ang mga Hudiyo adunay laing pagsabot sa silingan. Una sa tanan, ang silingan mao ang ilang isig ka Hudiyo, bisan kon hain kini nagpuyo. Dugang pa niini, ila usab nga isipong silingan ang mga hentil nga nahimong Hudiyo (converts to Judaism). Sa ato pa, giila sa mga Hudiyo nga silingan kadtong parehas nila og lahi o parehas nila og pagtoo. Gipangutana si Jesus sa usa ka magtutudlo sa balaod, “Kinsa man ang akong silingan ?” Iya kining gitubag pinaagi sa paghatag sa sambingay sa Maayong Samariyanhon. Ang maong sambingay dili makalipay sa mga Hudiyo. Ngano man ? Diha sa sugilanon, ang pari ug ang Levita, nga labing tinahud sa mga Hudiyo, wala malooy ug wala motabang sa nagkadugo nga biktima sa mga tulisan. Apan ang Samariyanhon, nga giila sa mga Hudiyo nga hugaw ug daotang tawo, mibati'g dakong kalooy ug miluwas sa tawo nga himalatyon.  Sa katapusan sa sambingay, ang Samariyanhon gidayeg tungod kay siya nagpakita man og dakong kalooy ug mitabang sa tawo nga himalatyon diha sa dalan. Para sa atong Ginoong Jesus, ang matawag nga silingan dili kadtong tawo nga duol kanato’g balay o managsama kanato’g lahi o pagtoo, kondili kadtong mga tawo nga adunay panginahanglan. Ang mga tawo nga anaa sa kalisud maoy atong silingan. Kon kita motabang sa maong tawo, pagailhon kita sa Ginoo nga Buotang Silingan. Aron mabati nato ang gibug-aton sa mensahe niining maong sambingay, maghimo kita’g susamang sugilanon nga puwedeng mahitabo dinhi sa ato. Dihay usa ka batan-ong babaye nga naglingkod ug nagsigi'g hilak sulod sa merkado. Nalabyan siya sa usa ka pari ug gipangutana, “Inday nganong naghilak ka man ?” Ug mitubag ang babaye, “Padre, gikuotan ko'g pitaka. Nawala ang kwarta nga ako untang ipalit og tambal para sa akong inahan nga masakiton. Unsaon na lang ni karon.” Ang pari miingon, “Pastilan, gadanghag man sab ka. Sa sunod magbantay na ka pagsulod sa merkado kay daghang mangunguot dinhi. Ayaw nag punay og hilak diha kay wala ka nay mahimo. Pauli na lang sa inyo. I-ampo nako nga mamaayo ra ang imong nanay.” Human makalakaw ang pari, nalabyan na usab siya ug usa ka lay minister ug ang babaye nagpadayon lang gihapon sa pagbakho. “Inday, nganong naghilak ka man ?” nangutana ang lay minister. Sa samang paagi, gisugilon sa babaye ang nahitabo. Unya miingon ang lay minister, “Inday, pauli na lang sa inyo. Ako nay bahalang mopahimangno sa mga pulis aron manakop sa mga mangunguot dinhi sa merkado.” Nahitabo nga dihay tindero nga Muslim duol sa gilingkoran sa babaye. Nadungog niya ang gisulti sa babaye mahitungod sa nahitabo kaniya. Ug nalooy siya pag-ayo sa babayeng biktima sa pagpanguot. Unya, miduol siya ug giingnan ang babaye: “Inday, palihog dawata kining akong gamay nga tabang para sa imong nanay nga masakiton.” Dayon gitunol niya ang P1,000 ngadto sa babaye. Pangutana : Kinsa man para kanato ang nagbuhat sa kabubut-on sa Dios – ang pari, ang lay minister o ang Muslim nga tindero ? Kon moingon kita nga ang Muslim nga tindero maoy nagbuhat sa angay nga buhaton, atong gidawat nga bisan kinsa puwedeng mohimo og maayong buhat. Kining Ebanghelyo karon magdasig kanato, una sa tanan, nga mahimong maayong mga silingan sa mga tawong adunay panginahanglan. Dili unta kita mobati lamang og kalooy kondili molihok aron sa pagtabang sa mga naglisod. Ug ikaduha, ang Ebanghelyo magdasig usab kanato nga wagtangon ang mga daotang hunahuna ug pagbati sa mga tawo nga lahi kanato og pagtoo. Kristiyano, Muslim, Buddhist, o si bisan kinsa, adunay kapasidad nga mahimong dalaygon nga anak sa Dios, o buotang Samaritano.

pohsiBtebAyU