Mateo 9:1-8

 Ang Santos nga Ebanghelyo sumala ni San Mateo 9:1-8 (Thu. June 30, 2022)

Misakay si Jesus sa usa ka sakayan ug mibalik pagtabok sa lanaw ug miabot sa Iyang kaugalingong lungsod. Unya may pipila ka tawo nga naghatod ngadto Kaniya ug usa ka paralitiko nga gipahigda sa duyan. Nakita ni Jesus ang kadako sa ilang pagsalig Kaniya ug miingon Siya sa paralitiko, “Anak, ayaw kabalaka kay gipasaylo na ang imong mga sala.” Unya may pipila ka magtutudlo sa Balaod nga miingon sa ilang kaugalingon, “Nagpasipala sa Dios kining tawhana !” Nasayod si Jesus sa ilang gihunahuna ug miingon Siya, “Nganong naghunahuna man kamog daotan ? Hain may sayon isulti, ‘Gipasaylo na ang imong mga sala’ o ‘bangon ug lakaw’? Karon ipakita Ko kaninyo nga ang Anak sa Tawo may gahom dinhi sa yuta sa pagpasaylo sa mga sala.” Busa miingon Siya sa paralitiko, “Bangon, dad-a ang imong gihigdaan ug pauli sa inyo !” Ug mibangon ang paralitiko ug mipauli. Sa pagkakita sa mga tawo niini, nahingangha sila ug gidayeg nila ang Dios tungod sa paghatag Niya niining gahoma ngadto sa mga tawo.

Pamalandong :

UNSA MAY MAKAPARALISA SA TAWO ? 

Labaw sa sakit nga lawasnon, ang makapaangol sa tawo mao ang sakit nga espirituhanon. Ang sala makaparalisa sa kasingkasing ug hunahuna. Tungod niini maglisod kita sa pag-alagad ug paghigugma sa usag-usa. Pananglitan, ang tawo nga bintahoso ug laog dili makatabang sa may panginahanglan, ug ang tawo nga adunay kerida dili makahatag og saktong pagtagad sa iyang pamilya. Aron kita makalingkawas sa talikala sa sala, gikinahanglan nato ang makaluwas nga lihok sa Dios diha sa Sakramento sa Pagpakighiuli. Pinaagi sa pagkompisal, atong madawat ang kapasayloan sa sala ug ang bag-ong sinugdanan sa kinabuhi. Sama sa mga tawo nga nagdala sa ilang kauban nga paralitiko ngadto kang Jesus, magtinabangay usab kita sa pagdala sa usag-usa ngadto sa Dios. Matod pa sa karaang sinultihon," It’s good to be blessed but It’s better to be a blessing."

pohsiBtebAyU