Mateo 5:43-48

 Ang Santos nga Ebanghelyo sumala ni San Mateo 5:43-48 (Tue. June 14, 2022)

“Nakadungog kamo nga giingon kaniadto, ‘Higugmaa ang imong mga higala ug dumti ang imong mga kaaway.’ Apan karon sultihan Ko kamo : higugmaa ang inyong mga kaaway ug pag-ampo kamo alang sa mga tawo nga nagpasipala kaninyo aron makita nga kamo matuod nga mga anak sa inyong Amahan nga atua sa langit. Kay Siya, sa walay pagpili, nagpasidlak sa Iyang adlaw ug naghatag ug ulan ngadto sa mga matarong ug sa mga makasasala. Nganong magpaabot man kamo ug ganti gikan sa Dios kon ang inyong gihigugma mao lamang kadtong mga tawo nga nahigugma kaninyo ? Dili ba bisan gani ang mga kobrador sa buhis nagbuhat man niana ? Kon kamo mahigalaon ngadto lamang sa inyong mga higala, unsa may nahimo ninyo nga labaw pa sa gihimo sa kadaghanan ? Dili ba bisan gani ang mga tawo nga wala moila sa Dios nagbuhat man niana ? Kinahanglang magmahingpit kamo ingon nga hingpit ang inyong Amahan nga atua sa langit.

Pamalandong :

UNSAON MAN PAGHIGUGMA ANG MGA KAAWAY ? 

Ang labing una nga paagi sa paghigugma sa mga kaaway mao ang pag-ampo alang kanila. Unsa may atong i-ampo para kanila ? I-ampo nato sila nga makakita sa kamatuoran, magmalinawon, makat-on sa pagpasaylo, mabulahan ug magmalipayon. Nga sa ato pa, atong i-ampo ang ilang kaluwasan. Ang pag-ampo alang sa kaaway gisugyot ni Kristo tungod kay kini makaayo dili lamang sa mga kaaway kondili sa atong kaugalingon usab. Pinaagi niini, kita maoy unang magmalinawon ug maluwas. Hinayhinay nga mawala kanato ang pagdumot ug ang pagtinguha sa pagpanimalos. Adunay kamatuoran ang komentaryo ni Gilbert K. Chesterton : “The Bible tells us to love our neighbors, and also to love our enemies; probably because generally they are the same people.”

pohsiBtebAyU