Lukas 24:46-53

 Ang Santos nga Ebanghelyo sumala ni San Lukas 24:46-53 (Sun. May 29, 2022 Feast of the Ascension of Jesus)

Ug miingon Siya kanila, “Kini mao ang nahisulat nga ang Mesiyas kinahanglan nga mag-antos ug unya mabanhaw sa ikatulong adlaw. Kinahanglan nga isangyaw pinaagi sa Iyang ngalan ang mensahe mahitungod sa paghinulsol ug sa pagpasaylo sa mga sala ngadto sa tanang mga nasod, sugod sa Jerusalem. Kamo mga saksi niining mga butanga. Ug Ako mismo mao ang magpadala nganhi kaninyo sa gisaad sa Akong Amahan. Apan kinahanglan maghulat kamo dinhi sa siyudad hangtod nga mokunsad kaninyo ang gahom gikan sa kahitas-an.” Unya gidala Niya sila ngadto sa gawas sa siyudad hangtod sa Betania, diin giisa Niya ang Iyang mga kamot ug gipanalanginan sila. Ug samtang gipanalanginan Niya sila, mibiya Siya ug gibayaw ngadto sa langit. Gisimba nila Siya ug unya mibalik sila sa Jerusalem nga malipayon kaayo. Kanunay silang didto sa Templo ug nagdayeg sa Dios.

Pamalandong :

Karong adlawa atong gisaulog ang kapistahan sa Pagsaka sa Langit ni Kristo. Kining maong misteryo nahitabo 40 ka adlaw human nabanhaw ang Ginoo.  Didto sa usa ka bukid, human Niya bendisyoni ug hatagi’g katapusang pahimangno ang mga tinun-an, si Jesus hinayhinay nga nibiya sa Iyang mga sumusunod ug gibayaw ngadto sa langit. Maingon nato nga kadtong maong hitabo nakapasubo pag-ayo sa mga tinun-an ni Jesus tungod kay kadto ang katapusang higayon diin ilang nakita ang lawasnong presensya sa Magtutudlo. Apan sukwahi sa atong gituohan, kay atong nadungog sa Ebanghelyo karon nga human si Jesus gibayaw paingon sa langit, gisimba Siya sa mga tinun-an ug sila namauli sa Jerusalem nga “puno sa kalipay.”

Ngano man nga gikalipay pag-ayo sa mga tinun-an ang pagbiya ni Jesus ?

Una sa tanan, ang pagsaka ni Jesus sa langit maoy usa ka dakong pagmatuod sa Iyang gisulti nga Siya Anak sa Dios ug nga Siya gikan sa kahitas-an. Tungod sa ilang nasaksihan, ang mga apostoles wala nay pagduhaduha sa Dios nga ilang gitoohan. Ikaduha, ang pagsaka sa langit ni Jesus naghatag sa mga tinun-an og dakong paglaum nga sila usab makasulod sa Gingharian sa Dios. Sa Ebanghelyo ni San Juan, si Jesus miingon sa Iyang mga tinun-an : “Sa balay sa Akong Amahan adunay daghang mga lawak. Sa Akong pag-adto mag-andam Ako og luna para kaninyo aron kon asa Ako atua usab kamo” (14:3). Ang mga tinun-an gibati og dakong kalipay tungod kay si Jesus nag-una na kanila ngadto sa langit aron andamon ang ilang agianan ug lugar nga kapuy-an. Ug ikatulo, ang mga tinun-an nagmalipayon tungod kay sila gipasaligan man ni Kristo sa Iyang makanunayong presensya. “Ako makig-uban kaninyo sa kanunay, hangtud sa katapusan sa panahon” (Mt 28:20). Sa ato pa, bisan tuod si Kristo nawala sa panan-aw sa mga tinun-an, Siya wala gayud mobiya kanila. Iyang gisaad nga sa dili madugay ang Balaang Espiritu ipadala sa Iyang Amahan aron maoy mahimong Diosnong presensya dinhi sa kalibutan. 

Unsa man ang kalambigitan ning maong Piyesta sa Pagsaka sa Langit sa atong Ginoo sa atong kinabuhi ?

Una sa tanan, ang Piyesta nagpahimangno kanato nga adunay langit nga nagpaabut sa atong kinabuhi. Si Kristo nga atong Ginoo nag-una kanato ; kon hain Siya karon, adto usab kita paingon. Kining maong pagtoo maghatag kanato’g kadasig sa pagpuyo og matarong nga kinabuhi haloyo sa mga pagsulay ug mga kalisdanan. Ang pagpakig-uban sa Dios didto maoy atong paningkamotang  makab-ot, “Kay unsa may makuha sa tawo kon maangkon niya ang tibuok kalibotan apan kawad-an siya og kinabuhi" (Mateo 16:26). Dugang pa niini, ang Piyesta nagpahinumdum kanato sa dakong misyon nga gibilin sa atong Ginoo. Sa wala pa Siya mosaka sa langit, si Kristo miingon sa Iyang mga tinun-an : “Panglakaw kamo sa tibuok kalibutan ug agniha ang mga tawo sa pagsunod Kanako. Bunyagi sila sa ngalan sa Amahan, sa Anak ug sa Espirito Santo, ug tudloi sila sa pagsunod sa tanan nga Akong gisugo kaninyo” (Mateo 28:18-19). Kining maong misyon gisangon dili lamang sa mga apostoles kondili sa tanang mga sumusunod ni Kristo. Karong panahona, kita na ang magpadayon sa misyon ni Kristo sa kalibutan. Kita ang “kahayag” nga gisugo sa Ginoo aron maghatag og lamdag sa katilingban. Kita ang “asin” nga gisaligan sa Ginoo nga maoy mohatag og kalami sa kinabuhi sa katawhan. Karong panahona maoy usa ka dakong kahigayonan nga atong ikapakita ang atong pagka-kahayag ug pagka-asin sa katawhan. Mahimo nato kini kon kita magpatunhay sa katarong ug kamatuoran, maghatag og maayong ehemplo sa mga kabataan. Usahay, subo palandungon nga sukwahi sa gisugo sa Ginoo ang gibuhat sa daghang mga Kristiyano. Imbis maoy kahayag, mao na hinoon ang nagdala og kangitngit pinaagi sa pagpanaot, pagtumotumo ug pagpanglingla sa katawhan. Imbis maghatag og kalami, mao na hinooy nagdala og kadaot pinaagi sa pagpangaway ug pagpanghulga. Kining mga buhata dili gayod makalipay ni Kristo ug dili magdala kanato ngadto sa langit uban sa Ginoo.

pohsiBtebAyU