Juan 6:60-69

 Ang Santos nga Ebanghelyo sumala ni San Juan 6:60-69 (Sat. May 7, 2022)

Daghan sa Iyang mga tinun-an ang nakadungog niini ug miingon, “Lisod kaayong dawaton kining pagtulon-ana. Kinsa bay makasabot niini ?” Bisa'g walay nagsulti Kaniya, nahibalo si Jesus nga nagbagulbol ang Iyang mga tinun-an bahin niini. Busa giingnan Niya sila, “Nakapabugnaw ba kini sa inyong pagtuo Kanako ?Pananglit makita ninyo ang Anak sa Tawo nga mokayab balik sa Iyang gigikanan, mabugnaw ba lang gihapon kamo ? Ang naghatag ug kinabuhi mao ang Espiritu sa Dios ug dili kini mahimo sa unod. Pinaagi sa mga pulong nga Akong gisulti kaninyo mabatonan ninyo ang Espiritu nga naghatag sa kinabuhi. Apan pipila kaninyo dili manuo.” (Nahibalo si Jesus sukad pa sa sinugdan kinsay dili motuo ug kinsay magbudhi Kaniya.) Ug midugang Siya sa pag-ingon, “Mao man gani nga gisultihan Ko kamo nga walay makaari Kanako gawas kon itugot kini sa Amahan.” Tungod niini daghan sa mga tinun-an ni Jesus ang mibiya ug wala na gayod mokuyog Kaniya. Busa miingon Siya sa 12 ka tinun-an, “Ug kamo, mobiya ba usab kamo Kanako ?” Si Simon Pedro mitubag Kaniya, “Ginoo, kinsa may among kapaingnan ? Anaa Kanimo ang mga pulong nga naghatag ug kinabuhing walay kataposan ! Nagtuo kami ug nasayod nga Ikaw mao ang Balaan nga mianhi gikan sa Dios.”

Pamalandong :

UNSA MAN ANG LAWOM NGA PAGTOO KANG KRISTO ? 

Daghan ang nisunod kang Kristo tungod kay nitoo sila sa Iyang mga pulong ug milagro. Apan sa dihang gihagit Niya sila sa mas lawom nga pagtoo, nga nag-apil sa pagkaon sa Iyang lawas, nibiya sila Kaniya. Kitang mga Katoliko miila sa presensya ni Jesus diha sa pan ug bino nga gikonsagra sa Santos nga Misa. Mitoo kita sa Iyang giingon, “Ang mokaon sa Akong unod ug moinum sa Akong dugo magpuyo dinhi Kanako ug Ako diha kaniya.” Sama kang Pedro, mitoo kita kang Kristo bisan dili matugkad sa hunahuna ang tanan Niyang gitudlo tungod kay Siya man ang Anak sa Dios. Sakto si Charles Spurgeon sa iyang ginaingon, " It is not great faith, but true faith, that saves ; and the salvation lies not in the faith, but in the Christ in whom faith trusts...It is not the measure of faith, but the sincerity of faith, which is the point to be considered."

pohsiBtebAyU