Juan 6:44-51

 Ang Santos nga Ebanghelyo sumala ni San Juan 6:44-51 (Thu. May 5, 2022)

Walay makaari Kanako gawas kon ang Akong Amahan nga nagpadala Kanako maoy mopaduol kaniya ngari Kanako ug banhawon Ko siya sa kataposang adlaw. Ang mga propeta nagsulat nga ‘Ang tanang tawo tudloan sa Dios.’ Ang mamati sa Amahan ug makakat-on gikan Kaniya moari Kanako. Apan wala kini magpasabot nga may nakakita sa Amahan. Siya nga gikan sa Dios mao lang ang nakakita sa Amahan. Sultihan Ko kamo : ang motuo may kinabuhing walay kataposan. Ako ang pan nga naghatag sa kinabuhi. Ang inyong mga katigulangan mikaon sa mana didto sa kamingawan. Bisan pa niini, nangamatay gihapon sila. Apan ania ang pan nga mianhi gikan sa langit aron bisan kinsa mahimong mokaon niini ug dili mamatay. Ako mao ang pan nga gikan sa langit nga naghatag sa kinabuhi. Ang mokaon niini nga pan dili gayod mamatay. Ug ang pan nga Akong ihatag mao ang Akong unod aron mabuhi ang kalibotan.”

Pamalandong :

UNSA MAY ANGAY NATONG BUHATON ARON MAKASUNOD KANG KRISTO ? 

Ang Ebanghelyo karon nagtudlo nga ang tanang kaayohan magsugod gayod sa Langitnong Amahan. Si Kristo miingon, “Walay makaari Kanako gawas kon ang Amahan nga nagpadala Kanako magdani kaniya.” Ang Dios Amahan dili magpugos sa tawo ; hinoon, Iya kitang danihon sa kaayo ug kanindot sa kinabuhi sa Iyang Anak nga si Jesu-Kristo. Samtang ang yawa moingon, ‘Tan-awa ang imong sala,’ ang Dios Amahan moingon, ‘Tan-awa ang Akong Anak’. Ang yawa gusto nga madiskurahe kita sa atong pagkatawhanon ; apan ang Dios Amahan buot nga moluwas kanato pinaagi sa Iyang Anak nga maoy mogiya kanato sa dalan padulong sa kaluwasan. Busa, mag-ampo kita sa Amahan nga Iya kitang ipaduol kanunay sa Iyang Anak nga si Kristo atong Ginoo. Matod pa sa tambag ni Kay Frost, " Be who God wants you to be, not what others want to see. The greatest prison people live in is the fear of what other people think.”

pohsiBtebAyU