Juan 13:16-20

 Ang Santos nga Ebanghelyo sumala ni San Juan 13:16-20 (Thu. May 12, 2022)

Sultihan Ko kamo : walay ulipon nga labaw sa iyang agalon ug walay sinugo nga labaw sa nagsugo kaniya. Karon nga nasayod na kamo sa maong kamatuoran, bulahan kamo kon inyo kining buhaton !” Wala Ako magsulti mahitungod kaninyong tanan. Nakaila Ako sa Akong gipili apan kinahanglan matuman ang kasulatan nga nag-ingon, ‘Ang tawo nga nakigsalo Kanako sa pagkaon nahimo nga Akong kaaway.’ Gisultihan Ko kamo niini sa wala pa kini mahitabo aron inigkahitabo na niini, motuo kamo nga ‘Ako mao.’ Sultihan Ko kamo : ang modawat kang bisan kinsa nga Akong ipadala, modawat usab Kanako. Ug ang modawat Kanako, modawat usab sa nagpadala Kanako.”

Pamalandong :

UNSAY MAHITABO KON ANG TAWO MAGPAKAGINOO ? 

Ang maong tawo magdala'g daghang kasakit tungod kay siya mahimong mapahitas-on, dili mosangpit og Dios, ug magdaugdaog sa iyang isigkatawo. Wala siyay kahadlokan ni pagtahud sa uban, bisan sa mga tigulang. Dili siya makamaong malooy ni motabang sa silingan ; gusto lang niya nga siya ang alagaran. Sa Ebanghelyo karon si Kristo nagpahinumdum kanato, “Walay sulugoon nga mas labaw pa kaysa iyang agalon, ug walay sinugo nga molabaw pa kaysa nagsugo kaniya.” Ang tawo nga makasabot niini magdalag kalipay tungod kay magmapaubsanon siya kanunay. Nasayod siya nga adunay Ginoo nga maoy tag-iya sa tanan, ang Dios nga mao lamay angay simbahon ug silbihan. Nindot ang pahinumdom ni San Agustin nga nagkanayon : “ It was pride that changed angels into devils ; it is humility that makes men as angels."

pohsiBtebAyU