Juan 12:44-50

 Ang Santos nga Ebanghelyo sumala ni San Juan 12:44-50 ( Wed. May 11, 2022)

Unya si Jesus misultig kusog, “Ang nagtuo Kanako wala magtuo Kanako lamang kondili Kaniya usab nga nagpadala Kanako. Ang nakakita Kanako nakakita usab Kaniya nga nagpadala Kanako. Mianhi Ako ingon nga kahayag sa kalibotan aron ang tanan nga nagtuo Kanako dili magpabilin sa kangitngit. Ang mamati sa Akong mensahe ug dili magtuman niini dili Ko hukman. Mianhi Ako dili aron pagsilot sa kalibotan kondili aron pagluwas niini. Adunay mosilot niadtong magsalikway Kanako ug dili modawat sa Akong mensahe. Ang Pulong nga Akong gisulti mao unya ang maghukom Kaniya sa kataposang adlaw ! Matuman gayod kini kay wala man Ako magsulti sa Akong kaugalingong kabubut-on. Ang Amahan nga nagpadala Kanako maoy nagsugo Kanako kon unsay Akong isulti. Ug nasayod Ako nga ang Iyang sugo naghatag ug kinabuhing dayon. Busa ang Akong gisulti mao ang gipasulti Kanako sa Amahan.”

Pamalandong :

SA UNSA MANG KANGITNGIT KITA BUOT LUWASON NI JESUS ? 

Gipasabot ni Jesus nga gusto Niya kitang luwason gikan sa kangitngit sa pagkawalay pagtoo. Ang tawo nga modumili sa pagdawat ug pagpaminaw Kaniya anaa pa sa kangitngit. Siya mao ang kahayag nga gipadala sa Langitnong Amahan dinhi sa kalibotan ug Siya mao ang kinatibuk-ang hulagway sa Dios Amahan. Kini ang Iyang giingon : “Ang nakakita Kanako nakakita usab Kaniya nga nagpadala Kanako...Wala Ako magsulti sa Akong kaugalingong kabubut-on, kondili sa Amahan nga nagpadala Kanako.” Busa, kon buot kitang malamdagan ang atong kinabuhi, si Jesus maoy atong sundon. Si Pope John Paul II nag-awhag : “Do not be afraid to be saints. Follow Jesus Christ who is the source of freedom and light. Be open to the Lord so that He may lighten all your ways.”

pohiBtebAyU