Lukas 4:16-21 / Juan 13:1-15

 Ang Santos nga Ebanghelyo sumala ni San Lukas 4:16-21 / San Juan 13:1-15 (Huwebes Santo Apr. 14, 2022)

Bisperas kadto sa Kasaulogan sa Pagsaylo. Nasayod si Jesus nga miabot na ang panahon sa Iyang pagbiya niining kalibotana ug pag-adto sa Amahan. Kanunay Niyang gihigugma kadtong mga Iya nga ania sa kalibotan ug gihigugma Niya sila hangtod sa kataposan. Nanihapon si Jesus ug ang Iyang mga tinun-an. Niadtong taknaa gitisok na sa Yawa ngadto sa hunahuna ni Judas nga anak ni Simon Iscariote, ang pagbudhi kang Jesus. Nasayod si Jesus nga gitugyan Kaniya sa Amahan ang tanang gahom ug nga Siya gikan sa Dios ug moadto sa Dios. Busa mitindog si Jesus, gihukas Niya ang Iyang sapaw ug nagbakos Siyag tualya. Unya naghuwad Siyag tubig sa planggana ug gihugasan Niya ang mga tiil sa mga tinun-an ug gipahiran sa tualya nga Iyang gibakos. Miduol Siya kang Simon Pedro ug si Pedro miingon Kaniya, “Ginoo, hugasan Mo ba diay ang akong tiil ?” Si Jesus mitubag, “Dili ka pa karon makasabot sa Akong gibuhat apan makasabot ka ra unya.” Si Pedro miingon, “Dili gayod ako magpahugas Nimo sa akong mga tiil !” Apan si Jesus mitubag, “Kon dili Ko hugasan ang imong mga tiil, wala kay labot Kanako !” Si Simon Pedro mitubag, Kon mao kana, Ginoo, dili kay ang mga tiil ko lamang ang hugasi kondili hasta usab ang akong ulo ug mga kamot !” Apan si Jesus miingon, “Ang nakaligo hinlo na ug dili kinahanglan nga manghugas pa, gawas sa iyang mga tiil. Kamong tanan hinlo na, gawas sa usa kaninyo.” Nasayod nang daan si Jesus kinsa ang magbudhi Kaniya, busa miingon Siya, “Kamong tanan hinlo na, gawas sa usa kaninyo.” Human Niya kahugasi ang ilang mga tiil, gisul-ob pag-usab ni Jesus ang Iyang sapaw ug mibalik Siya sa Iyang dapit sa lamisa. Unya nangutana Siya, “Nakasabot ba kamo sa Akong gibuhat kaninyo ? Kamo nagtawag Kanakog Magtutudlo ug Ginoo ug husto kana kay mao man kana Ako. Kon Ako nga inyong Ginoo ug Magtutudlo naghugas sa inyong mga tiil, kinahanglan nga maghinugasay usab kamo sa inyong mga tiil. Naghatag Ako kaninyog panig-ingnan aron inyong buhaton ang gibuhat Ko kaninyo.

Pamalandong :

Karong adlawa Huwebes Santo, ang adlaw sa wala pa mamatay si Jesu-Kristo. Gitawag usab kini og Maundy Thursday. “Maundy”, nagagikan sa pulong nga Latin “mandatum”, nga nagpasabot “sugo” (command) o “mandu” (order). Kini ang adlaw nga gisugo kita sa Ginoo. Kasagaran, unsa may buhaton sa usa ka tawo nga padulong na mamatay ? Manugon-tugon, dili ba ? Para kanato, ang katapusang mga pulong ug katapusang mga lihok sa tawo nga padulong na motaliwan, importante kaayo. Pipila ka mga oras sa wala pa Siya mamatay, si Jesus nagbilin kanato og duha ka importanteng mga sugo. Ang una gisaysay ni San Pablo sa iyang sulat ngadto sa taga-Corinto: “Ang Ginoong Jesus, sa gabii nga Siya gibudhian, mikuha sa pan, nagpasalamat sa Dios, ug gipikaspikas Niya ang pan ug miingon, ‘Mao kini ang Akong lawas nga gitugyan alang kaninyo. Buhata kini aron paghandum Kanako.’ Human sa panihapon gikuha Niya ang kupa ug miingon, ‘Mao kini ang kupa sa bag-ong kasabutan nga gitiman-an sa Akong dugo. Matag inum ninyo niini, buhata sa paghandum Kanako’” (1 Cor 11:23-26). Niining gabhiona, gitukod ni Jesus ang sakramento sa Santos nga Misa, aron mahimong kabilin ug mahimong tuboran sa grasya ug kaluwasan alang sa Iyang katawhan. Uban sa Misa, gitukod usab sa Ginoo ang institusyon sa pagkapari, pundok sa mga pinili nga mangulo sa kasaulogan sa Eukaristiya.

Ang ikaduhang sugo gisugilon sa Ebanghelyo ni San Juan. Samtang nanihapon, mibiya si Jesus sa lamesa, gihukas Niya ang Iyang sapaw, nagbakos og tualya, naghuwad og tubig sa planggana ug gihugasan ang tiil sa mga tinun-an. Pagkahuman, namulong Siya : “Kon Ako nga inyong Ginoo ug Magtutudlo naghugas sa inyong mga tiil, paghinugasay usab kamo sa inyong mga tiil. Naghatag Ako kaninyog panig-ingnan aron inyong buhaton ang gibuhat Ko kaninyo” (Juan 13:1-15). Niining gabhiona, gimanduan ni Jesus ang mga tinun-an sa pag-atiman ug pag-alagad sa usag-usa uban sa dakong gugma. “Buhata kini aron paghandum Kanako” (Pagsaulog sa Santos nga Misa) ug “Paghinugasay kamo sa inyong mga tiil” (Pag-alagad sa usag-usa) – Kini ang duha ka bililhong sugo ni Jesus nga kinahanglang buhaton sa usa ka tinuod nga magtutuo. Duha kini ka kasugoan nga nahilambigit pag-ayo ug dili maayong tumanon nga wala ang usa. Ang pagsaulog sa Eukaristiya maoy magdasig kanato sa pag-alagad sa usag-usa. Ug ang paghigugma ug pagtabang sa usag-usa maoy maghatag og kahulogan sa atong pagsaulog sa Santos nga Misa. Kining duha ka mga sugo seryoso nga gituman sa unang mga Kristiyanos. Sa Buhat sa mga Apostoles, kapitolo 2, atong masayran nga ang mga tinun-an magtapukan sa unang adlaw sa semana aron sa pagpaminaw sa mga pagtulon-an nga ihatag sa mga apostoles, pagpikas-pikas sa pan ug pag-ambit sa balaang panihapon. Unya, dili lang kana, ila pa gayod nga gituman ang sugo ni Jesus sa pag-atiman sa panginahanglan sa usag-usa.

Buhat 2:42 “Ug mainiton silang mipadayon sa pagpamati sa mga gitudlo sa mga apostoles, sa pagpakigsandurot uban kanila, sa pagpakigsalo sa pangaon, ug sa pag-ampo.”

Buhat 2:44 “Ang tanang mga magtutuo nagpadayon sa ilang panagkauban ug ang mga kabtangan sa matag usa gipanag-ambitan nilang tanan.” Kini ang hulagway sa tinuod nga Kristohanon nga katilingban, "the Eucharistic people." Naghiusa sa pagsimba sa Dios ug nagtinabangay sa pagtubag sa panginahanglan sa matag-usa. Apan, ang mga tinun-an wala magpabiling matinud-anon sa mga sugo ni Kristo. Atong masayran sa sulat ni San Pablo ngadto sa taga Corinto nga dihay ilang panagtigum nga dili dalaygon ug kini gisaway pag-ayo sa apostoles.

Corinto 11:17-22 “Gibalitaan ako nga nagkabahinbahin kamo sa inyong panagtigom ingon nga simbahan. Inigtigom ninyo ang inyong tuyo dili mao ang pagkaon  sa panihapon sa Ginoo tungod kay mag-unhanay man kamo. Ang uban dili mangabusog ug ang uban mangahubog. Wala ba kamoy kaugalingong mga balay diin kamo makakaon ug makainum ?  O palabihon ba ninyo nga tamayon ang simbahan sa Dios ug pakaulawan ang mga kabos ?” Atong masabot sa sulat ni San Pablo nga ang katilingban sa mga sumusunod ni Kristo mahimong salawayon kon sila walay pagtagad sa pagbati ug kahimtang sa usag-usa. Ang ilang pagpikaspikas sa pan mawad-ag bili ug dili na angayang tawgon nga Panihapon sa Ginoo kon sila dili magtagad sa panginahanglanon sa mga kabos nga igsoon.

Karong adlawa gusto sa Simbahan nga atong sabton ug bati-on pag-ayo kining maong pagtulon-an. Pamalandongan nato kini :

1. Ang kahiusahan nga atong gipakita sa Santos nga Misa ato bang gipuy-an diha sa atong kinabuhi sa katilingban ?

2. Ang atong pagsimba matag Domingo nakapahimo ba natong maluluy-on ug matinabangon sa isigkaingon ?

pohsiBtebAyU