Lukas 24:1-12

 Ang Santos nga Ebanghelyo sumala ni San Lukas 24:1-12 (Sabado Santo Apr. 16, 2022 Bihilya Sa Pasko Sa Pagkabanhaw)

Sayo kaayo sa pagka-Domingo sa buntag, miadto sa lubnganan ang mga babaye dala ang mga pahumot nga ilang giandam. Ug nakita nila nga naligid na ang bato nga giali sa pultahan sa lubnganan. Busa misulod sila apan wala nila hikit-i ang lawas sa Ginoong Jesus. Samtang nagbarog sila didto nga nangalibog mahitungod niini, sa kalit mitungha sa ilang tupad ang duha ka lalaki nga nagsul-ob ug sulaw nga bisti. Nangalisang pag-ayo ang mga babaye ug miduko sila, samtang miingon kanila ang duha ka lalaki, “Nganong gipangita man ninyo ang buhi diha sa mga patay ? Wala na Siya dinhi ! Nabanhaw Siya ! Hinumdomi ang Iyang gisulti kaninyo sa didto pa Siya sa Galilea : ‘Ang Anak sa Tawo kinahanglan nga itugyan ngadto sa mga makasasala ug ilansang sa krus ug unya banhawon sa ikatulong adlaw.’” Unya nahinumdoman sa mga babaye ang Iyang gisulti. Namauli sila ug gisugilon nila kining tanan ngadto sa 11 ka apostoles ug sa uban. Ang mga babaye mao si Maria Magdalena, si Juana ug si Maria nga inahan ni Santiago. Kini sila ug ang ubang mga babaye nga kauban nila nanugilon niining mga butanga ngadto sa mga apostoles. Apan naghunahuna ang mga apostoles nga binuang ang gisulti sa mga babaye busa wala sila motuo kanila. Apan mitindog si Pedro ug midagan ngadto sa lubnganan. Milili siya ug nakita niya nga ang panapton nga giputos kang Jesus mao na lay nahibilin didto. Unya mipauli siya nga naglibog kon unsa gayod kaha ang nahitabo.

Pamalandong :

Ang liturhiya karong gabhiona sugdan  pinaagi sa pagbendisyon sa bag-ong Kalayo nga maoy naghatag kanato’g kainit ug kahayag ning dulom nga kagabhion. Ang kahayag maoy simbolo ni Kristo nga nabanhaw gikan sa kamatayon ug nagdalag lamdag sa kalibotan. Ang kahayag ni Kristo nisinag ug nibuntog sa kangitngit sa atong kinabuhi ug sa katilingban. Atong nadungog sa mga pagbasa gikan sa Daang Kasabotan ang sugilanon sa pagbuhat sa Dios sa kalibotan ug sa Iyang pagluwas sa katawhan sa Israel gikan sa kamot sa mga Ehiptohanon. Kining buhat sa “pagpanggama” ug “pagpangluwas” kabahin sa dakong Plano sa Dios para sa Iyang piniling katawhan, nga nag-apil kanato karon. Apan, ang pinakahabog nga punto ning maong Plano mao ang misteryo sa Pagkabanhaw. Karong gabhiona, kanus-a kita nagsaulog sa Pagkabanhaw ni Kristo, mao ang pinakadakong selebrasyon sa Simbahan. Ang Roman Missal nagtawag niini og “Mother of All Vigils”, "the Greatest and the Most Noble of all Solemnities.” Matod pa sa Exultet nga giawit, “This is truly the most blessed night of all !”

Diha sa pagbasa gikan sa Bag-ong Kasabotan, si San Pablo (sa iyang sulat sa taga Roma) nagpahinumdum nga sa dihang kita nabunyagan, atong gibiyaan ang daan natong kinabuhi. Diha sa pagkahimong sumusunod ni Kristo, sama ra nga kita namatay uban kang Kristo ug nabuhi uban Kaniya. Sa bunyag, kita nagsugod og bag-ong kinabuhi (a new way of living), gibiyaan nato ang sala aron makig-uban sa Ginoo. Sa dili madugay,  bendisyonan sa pari ang bag-ong Tubig. Inyong mahinungan unya nga ang tubig paibabwan sa Krus. Ipakita sa liturhiya nga ang bag-ong kinabuhi sa grasya nagsumikad sa Krus. Ang kinabuhi sa grasya atong naangkon tungod sa kamatayon ug pagkabanhaw ni Kristo. Sulod sa Kwaresma, 40 kini ka adlaw nga gidala kita sa Simbahan ngadto sa kamingawan, ingon nga si Kristo gidala sa Espiritu didto sa disyerto, aron nga pakigbatokan ang sala ug ang mga tintasyon sa yawa. Sa dili madugay, atong bag-ohon ang atong mga panaad sa bunyag, ug atong ipadayag ang atong pagsalikway sa yawa ug sa iyang mga daotang pamaagi. Hinaot nga ato kining buhaton sa kinasingkasing gayod. Tinud-on gayod nato ang pagbiya sa daotang binuhatan ug ang pagsunod kang Kristo.

Ning Semana Santa, daghan kanato ang naglinya og dugay aron lang makakumpisal. Busa, daghan kanato karon, tungod sa kalooy sa Ginoo, nahatagan og bag-ong sinugdanan. Hinaot unta nga dili na kita mobalik sa daang binuhatan. Pinaagi sa pagkumpisal, sama ra nga nigawas kita sa lubnganan sa sala aron mabuhi sa grasya uban kang Kristo. Karon nga nakagawas na kita gikan sa lubnganan sa kasal-anan, maningkamot kita, kutob sa atong mahimo, nga magpabilin sa bag-ong kinabuhi nga atong nadawat gikan sa Dios. Dili kita magpabilin sa lubnganan sa sala. Kutob sa mahimo, maningkamot kita nga dili na magpalubong sa kasal-anan, ug mabuhi nga gawasnon uban sa Nabanhaw’ng Ginoo.

-    Kon ikaw nasakitan, nagdumot, ug gusto pang manimalos, ikaw anaa pa sa lubnganan, gawas na.

-     Kon ikaw sigi lag kahadlok ug kabalaka, walay pagsalig sa Ginoo, ikaw anaa pa sa lubnganan, gawas na.

-     Kon ikaw sigi lag hunahuna sa trabaho ug negosyo, walay panahon nga mag-ampo ug dili mosimba og Domingo, ikaw anaa pa sa lubnganan, gawas na.

-     Kon ikaw gusto nga makalamang, ug naghunahuna lamang sa imong kaugalingong kaayohan, ikaw anaa pa sa lubnganan, gawas na.

-     Kon ang imong hunahuna sirado sa uban, ug ang imong kasingkasing dili abli sa mga nag-antos ug nanginahanglan, ikaw anaa pa sa lubnganan, gawas na.

-   Kon ikaw na-adik sa cellphone, sa computer ug sa social media, wala nay panahon nga makig-estorya ni lolo ug lola, ikaw anaa pa sa lubnganan, gawas na.

-     Kon ikaw wala mahigugma sa imong pamilya, ug nalulong sa mga bisyo – alak, sugal, babaye, ug droga, ikaw anaa pa sa lubnganan, gawas na.

-     APAN, kon ikaw andam na nga mopasaylo ug makighiuli sa imong isigkatawo, happy Easter to you !

-     Kon ikaw makamao nang mosalig sa kalooy ug panabang sa Ginoo, happy Easter to you !

-     Kon ikaw nakasabot na nga ang kinabuhi dili lamang trabaho ug negosyo, kondili alang usab sa pamilya, higala ug, labaw sa tanan, alang sa Ginoo, happy Easter to you !

-     Kon ikaw makamao na nga malooy ug mopaambit og grasya ngadto sa isigkatawo, happy Easter to you !

-     Kon ikaw adunay dalunggan nga maminaw sa uban, ug kasingkasing nga andam motabang, happy Easter to you !

-     Kon ikaw nakasabot nga ang imong lolo, lola, ginikanan ug mga igsoon mas importante pa kaysa gadgets, internet ug social media, happy Easter to you !

-     Kon ikaw andam na nga mosumite sa rehabilitasyon aron makabiya sa imong mga adiksyon, happy Easter to you !

Adunay pa bay laing makahuloganong Pagkabanhaw para kaninyo ? Kon duna pa man gani, happiest Easter to all of you !

pohsiBtebAyU