Juan 21:1-19

 Ang Santos nga Ebanghelyo sumala ni San Juan 21:1-19 (Sun. May 1, 2022 Ikatulong Domingo Sa Pagkabanhaw)

Human niini, nagpakita na usab si Jesus sa Iyang mga tinun-an didto sa Lanaw sa Tiberias. Ang Iyang pagpakita ingon niini : nagkatigom sila si Simon Pedro, si Tomas nga ginganla'g Kaluha, si Natanael nga taga-Cana sa Galilea, ang mga anak ni Sebedeo ug ang duha ka laing tinun-an. Miingon kanila si Simon Pedro, “Managat ako.” Sila miingon, “Mouban kami.” Busa nangadto sila ug nanakay sa sakayan. Apan wala gayod silay nakuha tibuok gabii. Sa pagsubang na sa adlaw, nagtindog si Jesus didto sa lapyahan apan wala makaila ang mga tinun-an nga si Jesus diay kadto. Unya miingon Siya kanila, “Mga anak, nakakuha ba kamo ?” Sila mitubag, “Wala gayod.” Siya miingon kanila, “Itaktak ang inyong pukot dapit sa tuo sa sakayan ug makakuha kamo.” Busa gitaktak nila ang ilang pukot ug wala na sila makadaog pagbira niini kay daghan man kaayo ang ilang nakuha. Ang tinun-an nga gimahal ni Jesus miingon kang Pedro, “Ang Ginoo kana !” Sa pagkadungog ni Simon Pedro nga ang Ginoo diay kadto, gitapis niya ang iyang sapaw kay naghubo man siya ug miambak sa tubig. Ang ubang mga tinun-an nangadto sa lapyahan sakay sa sakayan nga nagbira sa pukot nga puno sa isda. Dili kaayo sila layo sa lapyahan—mga 90 ka metros lamang. Sa pagkawas na nila, nakita nila didto ang usa ka tapok sa binagang uling nga may isda nga gisugba ug may pan usab. Unya miingon si Jesus kanila, “Pagdala kamo diri ug pipila ka buok isda nga inyong nakuha.” Busa mikawas si Simon Pedro ug gibira niya sa lapyahan ang pukot nga napuno sa mga dagkong isda—153 ka buok ang tanan. Apan bisan pa sa kadaghan sa ilang nakuha, wala gayod magisi ang pukot. Unya miingon si Jesus kanila, “Dali ngari ug pangaon kamo.” Walay usa sa mga tinun-an nga nangahas pagpangutana Kaniya kon kinsa Siya kay nakaila man sila nga Siya mao ang Ginoo. Busa miduol si Jesus ug gikuha Niya ang pan ug gihatag kanila. Gihatag usab Niya ang isda. Ikatulo kining pagpakita ni Jesus ngadto sa mga tinun-an human Siya mabanhaw. Human nila'g pangaon, nangutana si Jesus kang Simon Pedro, “Simon, anak ni Juan, gihigugma mo ba Ako labaw sa paghigugma nimo niining mga butanga ?” Siya mitubag, “Oo, Ginoo, nasayod Ka nga gihigugma ko Ikaw.” Si Jesus miingon kaniya, “Atimana ang Akong mga nating karnero.” Unya miingon na usab si Jesus kaniya, “Simon, anak ni Juan, gihigugma mo ba Ako ?” Si Simon mitubag pag-usab, “Oo, Ginoo, nasayod Ka nga gihigugma ko Ikaw.” Si Jesus miingon kaniya, “Atimana ang Akong mga karnero.” Unya, sa ikatulong higayon, si Jesus miingon, “Simon, anak ni Juan, gihigugma mo ba Ako ?” Si Pedro nasubo tungod kay gipangutana man siya ni Jesus sa ikatulong higayon, “Gihigugma mo ba Ako ?” Ug si Pedro miingon Kaniya, “Ginoo, nasayod ka sa tanan. Nasayod ka nga gihigugma ko Ikaw !” Si Jesus miingon kaniya, “Atimana ang Akong mga karnero. Sultihan Ko ikaw sa matuod : sa batan-on ka pa ikaw ra ang nagbakos sa imong kaugalingon ug nakaadto ka sa bisan diin nga gusto mong adtoan. Apan inigkatigulang na nimo, idupa mo ang imong mga kamot ug lain na ang magbakos alang kanimo ug dad-on ka sa dapit nga dili mo gustong adtoan.” (Sa pagsulti Niya niini gipasabot ni Jesus kon unsang paagiha si Pedro mamatay aron paghimaya sa Dios.) Unya miingon si Jesus kaniya, “Sunod Kanako !”

Pamalandong :

UNSA MAY ANGAY NATONG BUHATON ARON MAHIMONG MGA EPEKTIBONG MANANAGAT UG MGA TAWO ?

Matag karon ug unya, ang tawo mapakyas, masayop, ug mosipyat. Wala may perpekto nga tawo ning kalibotan. Kon hatagan kita’g “second chance”, malipay gayod kita. Ang laing kahigayonan maghatag kanato'g bag-ong paglaum, bag-ong kadasig, ug bag-ong kahigayonan nga makab-ot ang kalampusan, kadaogan, ug kaluwasan.

Ang Dios andam maghatag sa tawo dili lang second chance kondili “unlimited chances.” Gusto Niya nga luwason kita ug dalhon sa Iyang kahimayaan, ug tungod niini, dili Siya mohunong sa paghatag kanato og mga bag-ong kahigayonan. Kini ang mensahe sa Ebanghelyo karong Domingoha. 

Ang Ebanghelyo nagsaysay sa pagdasig nga gihimo sa Nabanhaw’ng Ginoo ngadto sa mga tinun-an nga nanagat didto sa lanaw sa Tiberias nga walay kuha : “Itaktak ang inyong pukot dapit sa tuo sa sakayan ug makakuha kamo.” Ug sa dihang ilang gituman ang giingon ni Jesus, nakuha nila ang hilabihan kadaghang mga isda. Ang maong sugilanon dili bag-o sa atong mga dalunggan tungod kay dili kini ang unang higayon nga naghimo’g milagro ang Ginoo sa pagkuha og daghang mga isda ginamit ang mga kamot ug pukot sa Iyang mga tinun-an.

Ang unang milagro sa pagkakuha sa daghang isda nahitabo didto sa dagat sa Galilea sa dihang si Pedro gitawag ni Jesus sa pagbiya sa tanan aron pagsunod Kaniya. Human si Pedro nanagat sa tibuok gabii nga walay kuha, gisugo siya ni Jesus sa pagtaktak sa iyang pukot ug nakuha niya ang daghan kaayong isda. Dayon, giingnan siya sa Ginoo : “Sukad karon, managat kana og mga tawo” (Lukas 5:10). Ang gibuhat ni Jesus kang Pedro ug sa ubang tinun-an sa sinugdanan sa Iyang ministeryo publiko, Iyang gibuhat pag-usab human sa Iyang pagkabanhaw. Ngano man ? Tungod kay gusto Niya silang pahinumduman sa bokasyon nga ilang nadawat sa sinugdanan : Ang pagpanagat og mga tawo. Sa pagpasakit ug pagkamatay sa Ginoo didto sa kalbaryo, ang mga tinun-an nanago sa kalisang, ug si Pedro ninglimod nga siya kauban ni Jesus. Nasayod ang Ginoo sa gibati sa Iyang mga tinun-an. Dili Siya gusto nga panghimaraoton ug pakaulawan sila. Hinoon, gusto Niya silang tawgon og usab, ug hatagan og bag-ong kahigayonan sa pagtuman sa misyon nga gisangon sa Dios kanila : Ang pag-alagad sa Dios pinaagi sa pagpanagat og mga tawo. Gipangutana si Simon Pedro sa Nabanhaw’ng Ginoo : “Simon, anak ni Juan, gihigugma mo ba Ako labaw sa imong paghigugma sa uban ?” Ug si Simon Pedro mitubag, “Oo, Ginoo, nasayod Ka nga gihigugma ko Ikaw.” Ang maong pangutana gibalik-balik pagpangutana ni Jesus kang Pedro sa tulo ka higayon. Nganong katulo man ? Atong hinumduman nga didto sa Jerusalem, gilimod ni Pedro si Jesus sa tulo ka higayon. Karon, gihatagan siya ni Jesus og kahigayonan sa pagbawi sa iyang kaugalingon, sa pagmatuod og balik sa iyang gugma sa Dios. Kinahanglan siyang motubag sa tulo ka higayon : “Oo, Ginoo, nasayod Ka nga gihigugma ko Ikaw.”

Kining Ebanghelyo karon angay nga magdasig kanato. Nasayod kita nga sa daghang higayon napakyas kita sa pagsunod kang Kristo. Sama sa mga tinun-an, napakyas kita sa pagtuman sa Iyang mga sugo, napakyas kita sa paghigugma Kaniya, ug napakyas kita sa pagdala'g mga tawo paduol sa Dios. Sama sa mga tinun-an, karong adlawa, gipahinumduman usab kita sa Ginoo sa atong tawag ug misyon isip mga binunyagan : Ang pagpanagat og mga tawo para sa Dios. Ang maong misyon magsugod diha sa tagsatagsa nato ka kaugalingon, diha sa atong pamilya, diha sa atong opisina ug lugar trabahoan, diha sa merkado, ug diha sa atong gamay nga katilingban. Dalhon nato ang matag usa ngadto sa Dios pinaagi sa pag-atiman kanila ug paghatag kanila'g maayong ehemplo ug pagtulon-an. Sa pag-ingon ni Pedro, ““Oo, Ginoo, nasayod Ka nga gihigugma ko Ikaw”, gisundan dayon siya ni Jesus sa pag-ingon, “Atimana ang Akong mga karnero.” Sa samang paagi, kita nga miingon, “Gihigugma ko ang Dios”, angay nga maminaw ug mobuhat sa gisugo sa Ginoo, “Atimana ang Akong mga karnero.”

pohsiBtebAyU