Mateo 7:7-12

Ang Santos nga Ebanghelyo sumala ni San Mateo 7:7-12 (Thu. Mar. 10, 2022)

“Pangayo ug kamo hatagan ; pangita ug kamo makakaplag ; panuktok ug ang pultahan ablihan alang kaninyo. Kay ang mangayo hatagan ug ang mangita makakaplag ug ang manuktok ablihan. Kamong mga amahan, hatagan ba ninyo'g bato ang inyong anak kon mangayo siya'g pan ? O hatagan ba ninyo'g bitin kon mangayo siya'g isda ? Kon kamo nga mga daotan mahibalong mohatag ug maayong butang ngadto sa inyong mga anak, unsa pa kaha ang inyong Amahan nga atua sa langit ? Mohatag gayod Siya sa mga maayong butang niadtong mangayo Kaniya !“Buhata ngadto sa uban ang buot ninyo nga ilang buhaton nganha kaninyo : kini ang kahulogan sa Balaod ni Moises ug sa pagtulon-an sa mga propeta.

Pamalandong :

TUBAGON BA SA DIOS ANG ATONG MGA PAG-AMPO ? 

Si Kristo nag-ingon, “Pangayo ug hatagan kamo.” Apan, sumala sa atong kasinati-an, daghan sa atong mga gipangayo sa Dios diha sa pag-ampo wala mahatagi’g katumanan. Tungod niini, adunay mga tawo nga maluya sa pag-ampo, ug ang uban mawad-ag pagtoo. Dili unta kini mahitabo kanato. Atong sabton nga ang Dios motubag sa mga pag-ampo sa 3 ka paagi : Una, “Oo” tungod kay angayan kini ihatag kanimo ; ikaduha, “Dili” tungod kay kini makadaot para kanimo ; ug ikatulo, “Dili pa karon” tungod kay wala pa sa sakto nga panahon. Busa, kon dili nato madawat ang atong gi-ampo sa Dios, dili kita angay’ng mangluod. Matod pa sa usa ka magsusulat : “God's hand never slips. He never makes a mistake. His every move is for our own good and for our ultimate good.

pohsiBtebAyU