Mateo 23:1-12

Ang Santos nga Ebanghelyo sumala ni San Mateo 23:1-12 (Tue. Mar.15, 2022)

Unya miingon si Jesus sa mga tawo ug sa Iyang mga tinun-an, “Ang mga magtutudlo sa Balaod ug ang mga Pariseo mao ang may katungod sa paghubad sa Balaod ni Moises. Busa kinahanglan tumanon ug sundon ninyo ang tanan nga ilang isugo kaninyo. Apan ayaw ninyog sunda ang ilang mga buhat kay wala man sila magtuman sa ilang giwali. Nagbugkos sila ug bug-at nga mga karga nga gipapas-an nila sa mga tawo apan sila mismo dili gani mogamit bisag usa na lang ka tudlo aron pagtabang pagpas-an sa maong karga. Himoon nila ang tanan aron lamang sila makita sa mga tawo. Tan-awa ug unsa kadagko ang gisudlan nila sa mga sinulat nga mga bersikulo sa kasulatan nga ilang gibutang sa ilang mga agtang ug gihigot sa ilang mga bukton ! Ug tan-awag unsa kataas ang sidsid sa ilang mga sapot ! Gusto sila sa labing maayong mga dapit sa mga kombira ug sa mga linaing lingkoranan sa mga sinagoga. Gusto silang yukboan ug tahoron didto sa mga merkado ug tawgong ‘Magtutudlo’ sa mga tawo. Ayaw kamo pagpatawag ug ‘Magtutudlo,’ kay kamong tanan managsuon man ug usa ra ang inyong Magtutudlo. Ug dinhi sa kalibotan ayaw tawga si bisan kinsa nga ‘Amahan,’ kay usa ra ang inyong Amahan nga atua sa langit. Ayaw usab kamo pagpatawag ug ‘Agalon,’ kay usa ra ang inyong agalon nga mao ang Mesiyas. Ang labing dako kaninyo kinahanglang mahimo nga inyong sulugoon. Ang magpataas sa iyang kaugalingon ipaubos ug ang magpaubos, ipataas.

Pamalandong :

SAYOP BA ANG PAGTAWAG SA USA KA TAWO OG “MAGTUTUDLO”, “AMAHAN”, UG “PANGULO”? 

Ang pagdili ni Kristo sa pagtawag ni bisan kinsa dinhi sa yuta nga “Magtutudlo”, “Amahan”, ug “Pangulo” usa ka paagi sa pagsulti nga gipalabi-an (hyperbole) aron sa pagtudlo og mahinungdanong mga punto. Dili tuyo ni Jesus nga bawalan kita sa pagtawag sa atong titser og “magtutudlo”, o sa atong tatay og “amahan”, o sa atong presidente og “pangulo” tungod kay kini gibuhat man sa mga matarong nga tawo sa Iyang panahon. Ang Iyang tumong mao ang pagsaway sa kinaiya nga mag-apas lamang sa mga titulo ug pasidungog. Gisaway usab Niya ang batasan nga mapasigarbohon ug mapahitas-on. Sakto ang giingon : “It’s not the honors, titles, and power that is of ultimate importance. It’s what resides inside.”

pohsiBtebAyU