Mateo 1:16,18-21,24 / Lukas 2:41-51

Ang Santos nga Ebanghelyo sumala ni San Mateo 1:16,18-21,24 / San Lukas 2:41-51 (Sat. Mar. 19, 2022 Kapistahan Ni San Jose, Bana Ni Santa Maria)

Si Jacob mao ang amahan ni Jose,  ang bana ni Maria nga maoy inahan ni Jesus nga giilang Mesiyas. Mao kini ang kaagi sa pagkatawo ni Jesu-Cristo. Ang Iyang inahan nga si Maria niadtong panahona gitakda nga maminyo kang Jose. Apan sa wala pa sila magtipon nakamatikod si Maria nga nagsabak siya pinaagi sa gahom sa Espiritu Santo. Si Jose nga iyang pamanhonon tawo nga matarong ug dili buot nga pakaulawan niya si Maria atubangan sa mga tawo. Busa nagplano siya sa pagpakigbulag kaniya sa hilom. Samtang naghunahuna siya niini, mipakita kaniya ang usa ka anghel sa Ginoo pinaagi sa damgo ug miingon, “Jose, kaliwat ni David, ayaw kahadlok sa pagpangasawa kang Maria kay siya nagsabak pinaagi sa gahom sa Espiritu Santo. Manganak siyag batang lalaki ug nganli siyag Jesus kay luwason Niya ang Iyang katawhan gikan sa ilang kasal-anan.” Busa sa pagmata ni Jose gituman niya ang gisugo sa anghel ug gipangasawa niya si Maria."

Pamalandong :

UNSA MAN ANG MGA HIYAS SA TINOOD NGA LALAKI ?

Adunay moingon : “Lalaki ka kon kahadlokan ka, “ Lalaki ka kon kusog ka moinum," ug “Lalaki ka kon daghan kag uyab.” Sa pagkatinuod, ang mga sikolohista naga-asoy  nga ang pag-inisog pwede nga takuban lamang sa lawom nga kahuyang sa tawo. Giingnan usab kita nga ang pagpanghambog usa ka timailhan sa kakulang sa self-confidence, kakulang sa abilidad, ug kakulang sa pagtagad. Ang Simbahan naghatag kanato’g modelo sa tinuod nga lalaki – si Jose nga bana ni Maria. Usa siya ka tawo nga matarong. Wala siya mag-inisog, apan nagpakita og kalig-on taliwala sa mga peligro. Hilom, apan daghan og gihimo. Sibo ni Jose ang giingon ni Henry W. Beecher : “The strength of a man consists in finding out the way in which God is going, and going in that way too.”

pohsiBtebAyU