Lukas 13:1-9

Ang Santos nga Ebanghelyo sumala ni San Lukas 13:1-9 (Sun. Mar. 20, 2022)

Niadtong higayona may mga tawo didto nga misugilon kang Jesus mahitungod sa mga taga-Galilea nga gipamatay ni Pilato samtang naghalad sila ngadto sa Dios. Apan miingon si Jesus kanila, “Nagtuo ba kamo nga labaw pa sila ka makasasala kay sa ubang Galileanhon tungod kay gipamatay kining mga tawhana sa maong paagi ? Dili ! Sultihan Ko kamo nga kon dili kamo maghinulsol ug mobiya sa inyong mga sala, mangamatay usab kamong tanan sama kanila ! Mahitungod niadtong 18 nga nangamatay didto sa Siloam kay natumpagan sa tore, naghunahuna ba kamo nga kadto sila mas daotan pa kay sa tanang lumolupyo sa Jerusalem ? Dili ! Sultihan Ko kamo nga kon dili kamo maghinulsol ug mobiya sa inyong mga sala, mangamatay usab kamong tanan sama kanila.” Unya misulti si Jesus kanila niining sambingaya: “May usa ka tawo nga may kahoyng igera diha sa iyang parasan. Miadto siya aron pagpangita ug bunga niini apan wala siyay nakaplagan. Busa miingon siya sa iyang hardinero, ‘Tan-awa ra, tulo na karon ka tuig nga nag-anhian ako dinhi aron pagpangitag bunga niining kahoya, apan wala gayod akoy nakaplagan bisag usa. Busa putla kini kay nag-usik lamang sa katambok sa yuta.’ Apan ang hardinero mitubag, ‘Pasagdi una, Sir, bisan niining tuiga na lamang kay akong kalotan ang palibot sa punoan ug unya akong abunohan. Kon mamunga kini sa sunod tuig, maayo. Apan kon dili, ipaputol kini.’”

Pamalandong:

UNSA MAY GILAOMAN SA DIOS GIKAN KANATO NING KALIBOTAN ? 

Ang sambingay sa Kahoy’ng Igera nagtudlo nga ang Dios, nga maoy tag-iya sa parasan, gusto nga kita mamunga’g daghang kaayohan. Ang Dios masubo kon kita dili magmabungahon, kon kita dili makahimo’g maayo sa katilingban, o kon kita dili makapaambit sa Iyang gugma ngadto sa uban. Kon kita walay mahimong kaayohan, angay na kitang wagtangon, sama sa kahoy nga angay nang putlon. Pero, si Jesus, nga maoy atong Tig-amoma, puno sa kalooy ug pasensya kanato. Gidasig Niya kita karon sa pagbiya sa daotang binuhatan ug pagsugod og bag-ong kinabuhi. Matod pa, “We bear fruit when the characteristics of Jesus are evident in our life.” Busa, puy-an nato ang mga hiyas ni Kristo aron kita makapamunga og maayo.

pohsiBtebAyU