Lukas 11:14-23

  Ang Santos nga Ebanghelyo sumala ni San Lukas 11:14-23 (Thu. Mar. 24, 2022)

Usa ka panahon niana gipapahawa ni Jesus ang yawa nga amang. Ug sa nakagula na ang yawa, nakasulti ang tawong amang ug nahibulong ang mga tawo. Apan pipila kanila miingon, “Si Beelsebul nga pangulo sa mga yawa maoy naghatag Kaniya'g gahom sa pagpapahawa kanila !” Dihay uban nga buot mobitik Kaniya mao nga mihangyo sila Kaniya sa paghimo'g usa ka milagro aron pagpaila nga Siya pinadala sa Dios. Apan nahibalo si Jesus sa ilang mga hunahuna ug miingon Siya kanila, “Bisan unsang nasora nga magkabahinbahin ug mag-unay pag-away dili molungtad ug dugay, ug ang banay nga mabahinbahin mabungkag. Busa kon diha usab sa gingharian ni satanas may mga pundok nga nag-unay ug away, unsaon man paglungtad sa maong gingharian ? Nag-ingon kamo nga naghingilin Ako sa mga yawa tungod kay gihatagan Ako ni Beelsebul ug gahom paghimo niini. Kon giingon Nako niini paghingilin ang mga yawa, giunsa man diay sa inyong mga sumusunod pagpapahawa kanila ? Ang inyong kaugalingong mga sumusunod nagpaila nga sayop gayod kamo ! Ang tinuod mao nga naghingilin Ako sa mga yawa pinaagi sa gahom sa Dios ug nagpamatuod kini nga miabot na ang paghari sa Dios diha kaninyo. “Kon ang usa ka tawo nga kusgan ug sangkap sa tanang hinagiban magbantay sa iyang balay, dili gayod kahilabtan ang iyang mga butang. Apan kon may mas kusgan pa nga mosulong ug mobuntog sa maong tawo, ang labing kusgan moilog sa tanang hinagiban nga gisaligan niadtong tawhana ug bahinbahinon sa mas kusgan ang tinulis. “Ang dili dapig Kanako batok gayod Kanako, ug ang dili motabang Kanako sa pagtigom, nagpatibulaag.

Pamalandong :

KANG KINSANG GINGHARIAN KITA NAHISAKOP – SA KAHAYAG BA O SA KANGITNGIT ?

Ang tawo nga magbuhat kanunay og maayo iya gayod sa kahayag ; samtang ang tawo nga puno sa kadaotan iya gayod ni kangitngit. Apan, posible ba nga ang tawo mahimong sakop sa Dios ug sa daotan ? Mahimo ba siya nga mang-Ginoo matag Domingo lamang ug mang-demonyo gikan sa Lunes kutob sa Sabado ? O kaha, nga mangawkaw siya sa gobyerno ug unya mohatag og limos sa simbahan o sa mga kabos ? Sa pagkatinuod, “Walay tawo nga makaalagad sa duha ka agalon.” Para kanato, ang Ginoo lamang ang angay'ng alagaran. Likayan nato ang pagbuhat og daotan tungod kay kini magdala kanato sa dalan sa kaalaotan. Dili man kita perpekto, apan mahimo natong pahari-on diha sa atong kasingkasing ang kaayo. Sakto ang giingon ni Mother Teresa nga, "The world is full of good people. If you can’t find one, be one."

pohsiBtebAyU