Juan 4:43-54

 Ang Santos nga Ebanghelyo sumala ni San Juan 4:43-54 (Mon. Mar. 28, 2022)

Tapos sa duha ka adlaw, miadto si Jesus sa Galilea kay Siya mismo nag-ingon, “Ang propeta dili tinahod sa iyang kaugalingong lungsod.” Sa pag-abot Niya sa Galilea, gidawat Siya sa mga Galileanhon kay sila miadto man sa Jerusalem sa Kasaulogan sa Pagsaylo ug nakakita sa tanan nga Iyang gibuhat didto. Busa mibalik si Jesus sa Cana sa Galilea diin ang tubig Iyang gihimong bino. Ug didto may usa ka opisyal sa kagamhanan nga may anak nga lalaki nga nasakit didto sa Capernaum. Sa pagkadungog niya nga si Jesus miabot sa Galilea gikan sa Judea, miadto siya kang Jesus ug mihangyo Kaniya nga moadto Siya sa Capernaum aron ayohon ang iyang anak nga himalatyon. Si Jesus miingon kaniya, “Wala gayod kaninyoy motuo Kanako gawas kon makakita kamog mga milagro.” Ang opisyal mitubag, “Sir, kuyog na intawon kanako sa dili pa mamatay ang akong anak.” Si Jesus mitubag kaniya, “Lakaw na, kay ang imong anak naayo na !” Mituo ang tawo sa gisulti ni Jesus ug mipauli siya. Samtang nagpadulong siya sa iyang balay, gitagbo siya sa iyang mga sulugoon ug gibalitaan nga naayo na ang iyang anak. Unya iya silang gipangutana unsang orasa naayo ang iyang anak ug sila mitubag, “Gahapon sa ala una gihuwasan siya sa hilanat.” Unya nahinumdom ang amahan nga mao gayod kadtong orasa nga gisultihan siya ni Jesus nga naayo na ang iyang anak. Busa siya ug ang tanang sakop sa iyang panimalay mituo kang Jesus. Mao kini ang ikaduhang milagro nga gihimo ni Jesus sa Iyang pag-abot sa Galilea gikan sa Judea.

Pamalandong :

UNSA MAY MAKUHA SA TAWO NGA ADUNAY DAKONG PAGTOO SA DIOS ? 

Dihay tawo nga miduol kang Jesus ug mihangyo alang sa kaayohan sa iyang anak nga masakiton. Si Jesus miingon kaniya : "Pauli sa inyo. Ang imong anak naayo na." Ang tawo mipauli sa ila uban ang dakong pagsalig sa mga pulong ni Jesus. Wala niya baliha ang posibilidad nga dili mahitabo ang giingon ni Jesus ug nga kataw-an siya tungod sa iyang simpleng pagtoo. Apan, wala makawang ang iyang pagtoo tungod kay ang iyang anak naayo sumala sa giingon sa Ginoo. Kining Ebanghelyo karon magdasig kanato sa pagdala sa atong mga problema ngadto sa Dios uban ang dakong pagsalig nga kita Iyang paminawon, tabangan ug ayohon. Adunay nag-ingon, “Faith consists in believing when it is beyond the power of reason to believe.”

pohsiBtebAyU