Lukas 6:39-45

Ang Santos nga Ebanghelyo sumala ni San Lukas 6:39-45 (Sun. Feb. 27, 2022)

Ug gisultihan sila ni Jesus niining sambingaya : “Ang buta dili makaagak sa laing buta. Kon buhaton niya kini, mangahulog silang duha sa kanal. Walay tinun-an nga labaw sa iyang magtutudlo. Apan kon ang tinun-an hingpit nang nakat-on sa tanang gikatudlo kaniya, mahisama siya sa iyang magtutudlo. “Nganong nagtan-aw ka man sa puling sa imong isigkatawo apan wala mo tagda ang troso diha sa imong mata ? Unsaon mo man pag-ingon sa imong isigkatawo, ‘Ambi, ako'y pakuhaa sa imong puling,’ nga wala ka man gani makakita sa troso nga anaa sa imong kaugalingong mata ? Tigpakaaron-ingnon ! Kuhaa una ang troso nga anaa sa imong mata aron makakita ka pag-ayo ug makuha mo ang puling sa imong isigkatawo. “Ang maayo nga kahoy dili mamunga'g walay pulos nga bunga. Ang masakiton nga kahoy dili usab mamunga'g maayong bunga. Ang matag usa ka kahoy maila sa kaugalingon niyang bunga. Dili ka makapupo ug igos gikan sa sampinit o ubas gikan sa kadyapa. Ang maayong tawo magsulti'g maayo gikan sa maayong mga butang nga anaa sa iyang kasingkasing. Apan ang tawo nga daotan magbuhat ug daotan gikan sa mangil-ad nga mga butang nga anaa sa iyang kasingkasing. Kay kon unsa ang anaa sa kasingkasing sa tawo mao usab ang iyang isulti.

Pamalandong :

UNSAON MAN PAGTUDLO'G MORAL NGA KINABUHI NGADTO SA MGA KABATAAN ? 

Aron magiyahan ang mga kabataan sa hustong dalan, kinahanglang kita mismo masayod sa moral nga pagtulon-an ug magpuyo niini. Si Kristo nangutana, “Mahimo ba sa usa ka buta ang pag-agak og laing buta ?” Ang tubag niini dili gayod. Sa samang paagi, ang tawo nga wala mahibalo unsa ang moral nga pagtulon-an dili makatudlo niini ngadto sa laing tawo. Ug ang tawo nga wala magpuyo og moral nga kinabuhi dili usab makadasig og laing tawo sa pagkinabuhi nga matarong. Busa, kini ang dakong hagit alang sa mga ginikanan ug mga magtutudlo : sabton ang mga pagtulon-an ni Kristo ug puy-an kini sa matag adlaw. Adunay panultihon, “A good example is the best sermon.” Sa ato pa, ang maayong kinabuhi nga gipuy-an maoy labing nindot nga pagtulon-an.

pohsiBtebAyU