Marcos 6:45-52

 Ang Santos nga Ebanghelyo sumala ni San Marcos 6:45-52 ( Wed. Jan. 5, 2022)

Unya gipasakay dayon ni Jesus ang Iyang mga tinun-an sa sakayan. Gipauna Niya sila ngadto sa Betsaida sa tabok sa lanaw samtang gipapauli Niya ang mga tawo. Tapos Siya makapanamilit kanila, mitungas Siya sa usa ka bungtod aron pag-ampo. Nianang pagkagabii ang sakayan didto na sa taliwala sa lanaw ug si Jesus nag-inusara sa bungtod. Nakita Niya ang Iyang mga tinun-an nga naglisod sa ilang pagbugsay kay sungsungon man ang hangin. Nianang pagkakaadlawon giadto sila ni Jesus nga naglakaw sa tubig. Mosaylo lang unta Siya kanila apan sa ilang pagkakita Kaniya nga naglakaw sa tubig, naghunahuna sila nga kadto usa ka multo. Naniyagit sila tungod sa kahadlok. Apan miingon dayon si Jesus kanila, “Ayaw kamo kahadlok ! Salig kamo ; Ako kini !” Unya misakay Siya sa sakayan uban kanila ug milurang ang hangin. Nahibulong pag-ayo ang Iyang mga tinun-an ug naglibog sa nahitabo. Wala sila makasabot sa kahulogan sa milagro sa pan ug ang ilang hunahuna wala gayod makatugkad niadto.

Pamalandong :

PASAGDAN BA KITA SA GINOO PANAHON SA MGA SULIRAN UG KALISDANAN ? 

Usa ka inahan ang niduol sa pari ug nagpahungaw sa daghan niyang mga problema – lawas nga masakiton, bisyosong bana, anak nga badlongon, kawad-on sa kwarta, ug uban pa. Ang pari  nangutana kaniya : “Sa kalisod sa imong kinabuhi karon, motoo ka pa ba nga ang Ginoo mahigugmaon ?” Niyango siya, dayon nibakho sa paghilak. Unya  giingnan siya sa pari : “Ate, bulahan ka kaayo tungod sa kadako sa imong pagtoo. Bulahan ka nga mitoo nga bisan sa kalisod sa imong kahimtang, wala ikaw pasagdi sa Ginoo.” Ang Ebanghelyo karon nagtudlo nga si Jesus kanunay’ng nagsud-ong ug nagbantay sa Iyang mga ginsakpan. Sa panahon sa unos ug kalisod, moduol Siya kanato aron magdala’g kalinaw ug kahupayan. Matod pa ni St. Vincent de Paul, "If we only knew the precious treasure hidden in infirmities, we would receive them with the same joy with which we receive the greatest benefits, and we would bear them without ever complaining or showing signs of weariness."

pohsiBtebAyU