Marcos 6:34-44

 Ang Santos nga Ebanghelyo sumala ni San Marcos 6:34-44 (Tue. Jan. 4, 2022)

Sa pagkawas ni Jesus sa sakayan, nakita Niya ang dakong panon sa katawhan. Naluoy kaayo Siya kanila kay sama man sila sa mga karnero nga walay magbalantay. Gitudloan Niya sila ug daghang mga butang. Sa pagkahapon na, giduol Siya sa Iyang mga tinun-an ug giingnan, “Hapon na kaayo karon ug awaaw kining dapita. Busa paadtoa ang mga tawo sa kasikbit nga mga balangay aron makapalit silag makaon.” Apan mitubag si Jesus, “Kamoy mopakaon kanila.” Ug unya nangutana sila, “Papaliton ba kami Nimo ug pagkaon nga bali ug mga duha ka gatos ka denario aron ipakaon kanila ?” Ug miingon si Jesus kanila, “Susiha ninyo kon pila ka buok pan ang inyong dala.” Sa nasayran na nila kini, miingon sila Kaniya, “Lima ka pan ug duha ka isda.” Unya gisugo ni Jesus ang Iyang mga tinun-an nga sultihan ang mga tawo nga magpundokpundok ug manglingkod sa lunhawng mga sagbot. Busa nagpundokpundok ang mga tawo ug nanglingkod sa tinag-100 ug sa tinag-50. Ug gikuha ni Jesus ang lima ka pan ug ang duha ka isda ug mihangad Siya sa langit ug nagpasalamat sa Dios. Unya Iyang gipikaspikas ang mga pan ug gihatag sa Iyang mga tinun-an aron iapod-apod ngadto sa mga tawo. Iya usab nga gibahinbahin ang mga isda alang kanilang tanan. Nangaon ug nangabusog ang tanan. Ug ang nasalin sa pan ug sa isda gihipos sa mga tinun-an ug nakapuno kinig napulog-duha ka bukag. Sa tanan nga nangaon sa pan, 5,000 ang mga lalaki.

Pamalandong :

UNSA MAN ANG TINUOD NGA KALOOY ? 

Ang tinuod nga kalooy dili lamang usa ka pagbati sa kaguol o kasubo. Dili kini mapadayag pinaagi lamang sa paghilak o paggakos sa tawong gikaloy-an. Diha sa ebanghelyo gipakita ni Kristo sa Iyang mga tinun-an nga ang matuod nga kalooy magtuklod kanila sa pagpakighiusa sa mga gikaloy-an ug sa paglihok alang sa ilang kaayohan. Si Jesus gibati’g kalooy sa bagang katawhan nga nagsunodsunod Kaniya kay mura man sila’g mga karnero nga napasagdan. Nisugyot ang mga tinun-an nga papaulion ang mga tawo, apan wala kini niya buhata. Hinoon, giatiman ug gitubag ni Jesus ang ilang espirituhanon ug lawasnong panginahanglan pinaagi sa paghatag kanila og Diosnong pagtulon-an ug sa pagpakaon kanila’g isda ug pan. Matod pa ni Gautama Buddha, "Kindness is giving others happiness. Compassion is removing others' bitterness. Joy is freeing others from suffering.

pohsiBtebAyU