Marcos 1:14-20

 Ang Santos nga Ebanghelyo sumala ni San Marcos 1:14-20 (Mon. Jan. 10, 2022)

Sa dihang nabilanggo na si Juan, miadto si Jesus sa Galilea ug nagsangyaw sa Maayong Balita sa Dios. Miingon  Siya, “Miabot na gayod ang panahon nga maghari na ang Dios ! Busa hinulsoli ug biyai ang inyong mga sala ug tuohi ninyo ang Maayong Balita !” Samtang naglakaw si Jesus sa daplin sa Lanaw sa Galilea, nakita Niya ang magsoong mananagat, si Simon ug si Andres nga namukot. Unya miingon si Jesus kanila, “Kuyog kamo Kanako ug tudloan Ko kamo sa pagpanagat ug mga tawo.” Dihadiha gibiyaan nila ang ilang mga pukot ug mikuyog Kaniya. Mipadayon si Jesus sa unahan ug nakita niya si Santiago ug si Juan nga mga anak ni Sebedeo. Didto sila sa ilang sakayan nag-andam sa ilang mga pukot. Sa pagkakita ni Jesus kanila, gidapit Niya sila sa pagsunod Kaniya. Busa gibiyaan nila ang ilang amahan didto sa sakayan uban sa mga sinuholan ug mikuyog sila kang Jesus.

Pamalandong :

KINSA MAN ANG GUSTO NI JESUS NGA MAHIMONG KAUBAN SA PAGSANGYAW SA EBANGHELYO ? 

Ang unang mga tinun-an ni Jesus dili inila, dili edukado, ug dili adunahan. Si Simon, Andres, Juan ug Santiago mga ordinaryong mangingisda ; sila ang unang nakadungog sa tawag, “Dali, sunod kamo Kanako !” Adunay nag-ingon, “Jesus does not call the qualified ; he qualifies the called.” Kining mga mangingisda gipili ni Jesus dili tungod kay sila adunay igong katakos kondili tungod kay gusto Niyang ipakita kon unsay mahimo sa Dios ngadto sa mga tawo nga dili magpanuko sa pagsunod Kaniya. Ang mga mananagat og isda gihimo Niyang mananagat og mga tawo. Sa samang paagi, kita karon gitahasan ni Jesus nga managat og mga tawo pinaagi sa pagsaksi sa Ebanghelyo diha sa atong kinabuhi matag adlaw. Sa ato unyang pagpangagni nga mahadool sa Ginoo ang atong mga kaigsoonan, adunay nindot nga pahinumdom kanato si Kurt Vonnegut nga nagkanayon, "You don’t inspire others by being perfect. You inspire them by how you deal with your imperfections.

pohsiBtebAyU