Lukas 3:15-16,21-22

 Ang Santos nga Ebanghelyo sumala ni San Lukas 3:15-16,21-22 (Sun. Jan. 9, 2022 Kapistahan Sa Pagbunyag Sa Atong Ginoo)

Misugod pagtubo ang paglaom sa mga tawo ug nalibog sila kon kinsa gayod si Juan. Naghunahuna sila nga tingali siya mao ang Kristo. Busa miingon si Juan kanilang tanan, “Nagbunyag ako kaninyo pinaagi sa tubig apan may moabot nga labaw pa kaayo kay kanako. Dili gani ako angay bisan sa pagbadbad sa higot sa Iyang sandalyas. Bunyagan kamo Niya pinaagi sa Espiritu Santo ug sa kalayo. Tapos mabunyagi ni Juan ang tanang mga tawo, gibunyagan usab niya si Jesus. Samtang nag-ampo si Jesus, naabli ang langit ug mikunsad Kaniya ang Espiritu Santo sa dagway sa usa ka salampati. Unya nabati ang usa ka tingog gikan sa langit nga nag-ingon, “Ikaw mao ang pinangga Kong Anak. Nalipay kaayo Ako Kanimo.”

Pamalandong :

UNSA MAN KABILILHON  ANG BUNYAG ALANG KANATO ?

Sulod sa 30 ka tuig, si Kristo nagpuyo sa hilom ug ordinaryong kinabuhi. Apan human mabunyagi ni Juan, si Kristo nagsugod sa pagsangyaw sa Maayong Balita kalabot sa gugma sa Dios ngadto sa katawhan. Gihimo Niya kini dili lang sa pulong kondili sa buhat – nag-ayo Siya sa mga masakiton, nagpakaon sa mga gigutom, naghatag og paglaum sa mga kabos, ug uban pa. Ning kapistahan sa Pagbunyag ni Kristo, gipahinumduman kita sa atong kaugalingong bunyag, kanus-a kita nahimong mga sumusunod ni Kristo ug mga sinagop nga anak sa Dios. Nadawat nato dili lang ang dignidad sa pagka-anak sa Ginoo kondili apil usab niini ang dakong tahas sa pagpabati sa Iyang gugma ngadto sa tanan. 

pohsiBtebAyU