Lukas 1:1-4, 4:14-21

 Ang Santos nga Ebanghelyo sumala ni San Lukas 1:1-4, 4:14-21 (Sun. Jan. 23, 2022)

Halangdong Teofilo : Daghan ang nangako sa pagsulat sa asoy mahitungod sa mga panghitabo sa atong katilingban. Gisulat nila ang nadungog namo gikan sa unang mga nakasaksi nga nagsangyaw sa mensahe. Busa, halangdon nga Teofilo, tungod kay nasusi ko man pag-ayo kining tanan sukad sa sinugdan, nahunahuna nako nga angay kining isulat sa maayong pagkahan-ay alang kanimo. Gibuhat ko kini aron masayod ka sa tibuok nga kamatuoran sa mga butang nga gisaysay kanimo. 

Unya mipauli si Jesus sa Galilea ug diha Kaniya ang gahom sa Espiritu Santo. Mikaylap sa tanang kasikbit nga dapit ang balita mahitungod Kaniya. Nagtudlo Siya sulod sa ilang mga sinagoga ug gidayeg Siya sa tanan. Unya miadto si Jesus sa Nazaret diin Siya magdako ug sumala sa Iyang naandan miadto Siya sa sinagoga sa Adlaw nga Igpapahulay. Mitindog Siya aron pagbasa sa Kasulatan ug gitunol Kaniya ang basahon nga sinulat ni propeta Isaias. Gibukhad Niya ang linukot nga basahon ug maoy Iyang gibasa ang dapit diin nasulat kini : “Ang Espiritu sa Ginoo ania Kanako. Gidihogan Ako Niya aron pagsangyaw sa Maayong Balita ngadto sa mga kabos ; gipadala Ako Niya aron pagsangyaw sa kagawasan ngadto sa mga binihag ug pagpahiuli sa panan-aw sa mga buta, pagpagawas sa mga dinaugdaog ug pagpahibalo sa tuig nga ang Ginoo moluwas sa Iyang katawhan !” Unya gilukot ni Jesus ang basahon, giuli ngadto sa piniyalan ug milingkod Siya. Mitutok Kaniya ang tanan nga didto sa sinagoga. Unya miingon Siya kanila, “Natuman karong adlawa kining bahina sa kasulatan sumala sa inyong nadungog.”

Pamalandong :

UNSA MAY TUYO SA DIOS SA PAGPAHIMUGSO KANIMO NING KALIBOTAN ? 

Sa Iyang paghingkod, si Kristo nakasabot nga aduna Siya'y dakong misyon sa kinabuhi. Gipili Siya aron maghatag og katumanan sa panagna ni Isaias – ang “pagsangyaw sa Maayong Balita ngadto sa mga kabus …” Sama kang Kristo, matag usa kanato gipakatawo nga may Diosnong katuyoan. Dili mahitabo nga mahi-anhi kita sa kalibotan nga walay nagpaluyo niining tanan. Usa ka amahan miingon sa iyang anak, “Dong, mag-ampo ta sa Ginoo para sa atong silingan aron makakita siya’g kwarta nga ikapalit niya'g tambal.” Apan mitubag ang bata, “Tay, dili na nato samokon ang Ginoo. Kita na lay hatag sa atong silingan og kwarta para sa iyang tambal.” Bisan sa  kalinghod sa iyang pangedaron, ang maong bata nakasabot sa iyang misyon niining kalibotana. Matod pa ni Blake Mycoskie, " I believe each of us has a mission in life, and that one cannot truly be living their most fulfilled life until they recognize this mission and dedicate their life to pursuing it." 

pohsiBtebAyU